រដ្ឋមន្ត្រីការបរទេសអារ៉ាប៊ីសាអ៊ូឌីត ព្រះអង្គម្ចាស់ Faisal bin Farhan បានជួបជាមួយលោក Amos Hochstein បេសកជនពិសេសរបស់សហរដ្ឋអាមេរិកប្រចាំប្រទេសលីបង់ នៅទីស្នាក់ការក្រសួងការបរទេស ក្នុងទីក្រុងរីយ៉ាដ កាលពីថ្ងៃអាទិត្យ។

ទីភ្នាក់ងារសារព័ត៌មានអារ៉ាប៊ីសាអ៊ូឌីត(SPA) បានរាយការណ៍ថា កិច្ចប្រជុំនេះ បានផ្តោតលើបញ្ហាក្នុងតំបន់ ដោយមានការយកចិត្តទុកដាក់ជាពិសេសទៅលើស្ថានភាព នៅក្នុងប្រទេសលីបង់។

សារព័ត៌ SPA បានបន្ថែមថា ភាគីទាំងពីរ បានផ្លាស់ប្តូរទស្សនៈលើការវិវឌ្ឍថ្មីៗ និងស្វែងរកកិច្ចខិតខំប្រឹងប្រែងរួមគ្នា ដើម្បីដោះស្រាយបញ្ហាប្រឈម ដែលប្រជាជនលីបង់និងតំបន់ដ៏ធំទូលាយនេះ កំពុងជួបប្រទះ។

នៅក្នុងជំនួបនោះដែរ ព្រះអង្គម្ចាស់ Yazid bin Mohammed bin Fahd Al-Farhan ទីប្រឹក្សារដ្ឋមន្ត្រីក្រសួងការបរទេសសម្រាប់កិច្ចការលីបង់ ក៏បានចូលរួមក្នុងកិច្ចពិភាក្សានោះ។