អតីតនាយករដ្ឋមន្ត្រីថៃ លោក ថាក់ស៊ីន ស៊ីណាវ៉ាត់ (Thaksin Shinawatra) បានប្រកាសថា លោកនឹងមិនវិលត្រលប់ទៅកាន់តំណែងនាយករដ្ឋមន្ត្រីវិញទេ ហើយនឹងមិនប្រឹងប្រែងធ្វើដូច្នេះឡើយ។

ផ្ទុយទៅវិញ លោកនឹងផ្តោតលើការជួយដល់អាជីពនយោបាយរបស់កូនស្រីលោក គឺនាយករដ្ឋមន្ត្រី លោកស្រី ផែថងថាន ស៊ីណាវ៉ាត់ (Paetongtarn Shinawatra) និងជួយលើកកម្ពស់កម្រិតជីវភាពរបស់ប្រជាជនថៃ ក្នុងនោះរួមទាំងការសន្យាកាត់បន្ថយថ្លៃអគ្គិសនីមកត្រឹម ៣,៧០បាត (ប្រមាណជា ០,១១ដុល្លារ) ក្នុង ១គីឡូវ៉ាត់ម៉ោង នៅឆ្នាំ២០២៥។

ដោយបានថ្លែងនៅឯយុទ្ធនាការឃោសនាបោះឆ្នោត ក្នុងមូលដ្ឋាន សម្រាប់លោកស្រី Salakjit Tiyapairat ដែលកំពុងឈរឈ្មោះជាប្រធានរដ្ឋបាលខេត្ត Chiang Rai (PAO) ក្រោមស្លាកគណបក្សភឿថៃ (Pheu Thai) លោក ថាក់ស៊ីន បានលើកឡើងពីបំណុលសាធារណៈដ៏ច្រើនរបស់ប្រទេស។ គណបក្សកាន់អំណាចបានសុំរយៈពេល ២ឆ្នាំ ដើម្បីដោះស្រាយវិបត្តិបំណុលជាតិដែលកំពុងកើនឡើង។

អំឡុងពេលធ្វើសុន្ទរកថានោះ អតីតនាយករដ្ឋមន្ត្រី បានគូសបញ្ជាក់អំពីអាទិភាពសំខាន់ៗចំនួន ៣ របស់រដ្ឋាភិបាល សម្រាប់ឆ្នាំ២០២៥ ដែលមានការដោះស្រាយបញ្ហាទាក់ទងនឹងគ្រឿងញៀន ការលុបបំបាត់មជ្ឈមណ្ឌលហៅទូរសព្ទក្លែងក្លាយ និងការរុះរើភាពផ្តាច់មុខ ដើម្បីកាត់បន្ថយថ្លៃរស់នៅរបស់ពលរដ្ឋថៃ។

នៅពេលដែលអ្នកគាំទ្រដ៏ច្រើន បានអំពាវនាវឲ្យលោកវិលត្រលប់ទៅធ្វើជានាយករដ្ឋមន្ត្រីវិញ លោក ថាក់ស៊ីន បានច្រានចោលការលើកឡើងនេះ ដោយផ្ដល់ហេតុផលពីវ័យរបស់លោក។ លោកបានជំរុញដល់អ្នកចូលរួមឲ្យជួយគាំទ្រក្មេងៗជំនាន់ក្រោយជំនួសវិញ។ លោកបានកត់សម្គាល់ថា ជីវិតនៅឆ្ងាយពីឆាកនយោបាយ មានភាពស្រណុកសុខស្រួលជាង៕