នគរបាល នៅថ្ងៃចន្ទ (ទី៦ ខែមករា) បានប្រាប់ឲ្យដឹងថា យ៉ាងហោចណាស់នគរបាល ៨នាក់ និងអ្នកបើកបរម្នាក់ ត្រូវបានសម្លាប់នៅក្នុងហេតុការណ៍បំផ្ទុះគ្រាប់បែក ដែលបានធ្វើឡើងដោយក្រុមឧទ្ទាមម៉ៅនិយម នៅរដ្ឋ Chhattisgarh ភាគកណ្តាលប្រទេសឥណ្ឌា។

សេចក្តីថ្លែងការណ៍របស់នគរបាលបានឲ្យដឹងថា រថយន្តនគរបាលដែលជនរងគ្រោះកំពុងធ្វើដំណើរ ត្រូវបានវាយប្រហារដោយការបំផ្ទុះ នៅក្នុងតំបន់ Bijapur របស់រដ្ឋនេះ នាថ្ងៃចន្ទនេះ។

នេះជាការវាយប្រហារម្ដងម្កាលជាបន្តបន្ទាប់ចុងក្រោយបង្អស់ លើកងកម្លាំងសន្តិសុខ ក្នុងរដ្ឋនេះ។ វាកើតឡើងបន្ទាប់ពីមានការប្រយុទ្ធគ្នាដោយកាំភ្លើងជាញឹកញាប់ រវាងកងកម្លាំង និងក្រុមឧទ្ទាម ដែលឃើញថា សមាជិកក្រុមឧទ្ទាមជាច្រើននាក់ ត្រូវបានសម្លាប់ ក្នុងប៉ុន្មានខែថ្មីៗនេះ។

គួរបញ្ជាក់ថា ទាំងរដ្ឋ Chhattisgarh និងបណ្ដារដ្ឋជិតខាង នៅភាគកណ្តាល និងភាគខាងកើតឥណ្ឌា ត្រូវបានរងគ្រោះដោយការបះបោរអស់រយៈពេលជាច្រើនទសវត្សរ៍មកហើយរបស់ក្រុមឧទ្ទាមម៉ៅនិយម ទោះបីជាតំបន់ដែលពួកគេប្រតិបត្តិការ ត្រូវបានកាត់បន្ថយយ៉ាងច្រើន ក្នុងរយៈពេលប៉ុន្មានឆ្នាំមកនេះក៏ដោយ។

ក្រុមឧទ្ទាមម៉ៅនិយម និយាយថា ពួកគេកំពុងប្រយុទ្ធ ដើម្បីផ្តល់ឲ្យកសិករឥណ្ឌាក្រីក្រ និងកម្មករគ្មានដីធ្លី បានកាន់កាប់លើដីធ្លីរបស់ពួកគេ និងទាមទារកាន់តែធំជាងមុននូវតំបន់ធនធានរ៉ែ ដែលកំពុងត្រូវបានរុករកដោយក្រុមហ៊ុនធំៗជាច្រើន នាពេលបច្ចុប្បន្ននេះ៕