លោក Yoon Suk Yeol ប្រធានាធិបតីដែលត្រូវបានព្យួរតួនាទីរបស់កូរ៉េខាងត្បូង នៅតែរឹងទទឹងសំងំក្នុងលំនៅដ្ឋានរបស់លោក ខណៈក្រុមអ្នកស៊ើបអង្កេតស្វែងរកការបន្តដីកាចាប់ខ្លួនលើបទបញ្ជាច្បាប់អាជ្ញាសឹករយៈពេលខ្លីរបស់លោក។

ដីកាបច្ចុប្បន្ន ដែលបានផុតកំណត់កាលពីពាក់កណ្តាលអធ្រាត្រថ្ងៃចន្ទឆ្លងចូលថ្ងៃអង្គារនេះ ត្រូវបានចេញបន្ទាប់ពីលោក Yoon មិនអើពើការកោះហៅជាច្រើនសារដើម្បីបង្ហាញខ្លួនសម្រាប់ការសាកសួរលើការចោទប្រកាន់ពីបទបះបោរ និង បំពានអំណាចផងដែរ។

ក្រុមអ្នកស៊ើបអង្កេតប្រឆាំងអំពើពុករលួយបានព្យាយាមអនុវត្តការចាប់ខ្លួនកាលពីថ្ងៃសុក្រ បន្ទាប់ពីការប្រឈមដាក់គ្នារយៈពេល៦ម៉ោងជាមួយមន្ត្រីសេវាសន្តិសុខរបស់ប្រធានាធិបតីនៅឯគេហដ្ឋានរបស់លោក Yoon ។

ចាប់តាំងពីពេលនោះមក ក្រុមសន្តិសុខរបស់លោក Yoon បានដំឡើងបន្លាលួស និងបានបិទបរិវេណនោះដោយប្រើរថយក្រុង។

ក្រុមអ្នកស៊ើបអង្កេតបានប្រាប់សារព័ត៌មាន BBC ថាពួកគេបានស្នើសុំឱ្យនគរបាលអនុវត្តដីកានេះ ដោយសង្ឃឹមថាកិច្ចខិតខំប្រឹងប្រែងរបស់ពួកគេនឹងមានទម្ងន់កាន់តែខ្លាំង។

ប៉ុន្តែនគរបាលបានបដិសេធ ដោយនិយាយថា វាមានភាពចម្រូងចម្រាសតាមផ្លូវច្បាប់ ហើយការអនុវត្តន៍នេះគួរតែទុកឲ្យក្រុមអ្នកស៊ើបអង្កេតប្រឆាំងអំពើពុករលួយ។

កំហឹងជាសាធារណៈបានផ្ទុះឡើងក្នុងប៉ុន្មានសប្តាហ៍ថ្មីៗនេះ ខណៈក្រុមបាតុកររាប់ពាន់នាក់បានជម្នះនឹងព្រិលធ្លាក់ខ្លាំងកាលពីចុងសប្តាហ៍ ដោយមានទាំងក្រុមអ្នកគាំទ្រ និងប្រឆាំងនឹងលោកYoon៕