រដ្ឋមន្ត្រីការបរទេសសហរដ្ឋអាមេរិកលោក Antony Blinken បានព្រមានកាលពីថ្ងៃចន្ទដើមសប្ដាហ៍នេះថា រុស្ស៊ីប្រហែលជាជិតឈានដល់ដំណាក់កាលចែករំលែកបច្ចេកវិទ្យាផ្កាយរណបកម្រិតខ្ពស់ជាមួយកូរ៉េខាងជើងហើយ បន្ទាប់ពីប្រទេសឯកោមួយនេះ បានផ្គត់ផ្គង់កងទ័ពជួយជំរុញសង្គ្រាមរបស់ទីក្រុងមូស្គូក្នុងប្រទេសអ៊ុយក្រែន។

ក្នុងអំឡុងទស្សនកិច្ចនៅកូរ៉េខាងត្បូង លោក Blinken បាននិយាយពីឈ្មោះកូរ៉េខាងជើងថា ប្រទេសនេះកំពុងទទួលបានសម្ភារៈយោធានិងការហ្វឹកហ្វឺនរបស់រុស្ស៊ីរួចហើយ។ ឥឡូវនេះ យើងមានហេតុផលដើម្បីជឿថា ទីក្រុងមូស្គូមានបំណងចែករំលែកបច្ចេកវិទ្យាអវកាស និងផ្កាយរណបកម្រិតខ្ពស់ជាមួយទីក្រុងព្យុងយ៉ាង។

ប្រមុខការទូតអាមេរិករូបនេះ កំពុងបំពេញទស្សនកិច្ចទៅកាន់បណ្ដាប្រទេសជាសម្ព័ន្ធមិត្តដ៏សំខាន់របស់អាមេរិក ដែលជាផ្នែកមួយនៃដំណើរចុងក្រោយរបស់លោកទៅកាន់បរទេស នៅមុនពិធីស្បថចូលកាន់តំណែងរបស់លោក Donald Trump ហើយការអត្ថាធិប្បាយរបស់លោកបានកើតឡើងចំពេល កូរ៉េខាងជើងបានបាញ់សាកល្បងមីស៊ីលល្បឿនលឿនជាងសំឡេង។

អ្នកការទូតអាមេរិកដដែលក៏បានរំលឹកឡើងវិញផងដែរ នូវការព្រមានកាលពីថ្មីៗរបស់ឯកអគ្គរដ្ឋទូតអាមេរិកប្រចាំអង្គការសហប្រជាជាតិថា ប្រធានាធិបតីរុស្ស៊ីលោក វ្ល៉ាឌីមៀ ពូទីន ប្រហែលជិតទទួលយកកម្មវិធីអាវុធនុយក្លេអ៊ែររបស់កូរ៉េខាងជើង ដែលត្រូវគេមើលឃើញថា បានដើរហួសការប្តេជ្ញាចិត្តអស់ជាច្រើនទសវត្សរ៍របស់ខ្លួនក្នុងការលុបបំបាត់នុយក្លេអ៊ែរនៅឧបទ្វីបកូរ៉េ៕