ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump កាលពីថ្ងៃចន្ទ (០៦ មករា) បានបរាជ័យនៅក្នុងកិច្ចប្រឹងប្រែងដើម្បីពន្យារពេលការកាត់ទោសរបស់លោកនៅថ្ងៃសុក្រ ១០ មករា ខាងមុខនេះ សម្រាប់ការកាត់ទោសព្រហ្មទណ្ឌ ដែលកើតចេញពីប្រាក់បំបិទមាត់ឱ្យតារាអាសអាភាសម្នាក់។

ដោយលើកឡើងទាំងអភ័យឯកសិទ្ធិប្រធានាធិបតី និងតម្រូវការនៃពិធីឡើងកាន់តំណែងនៅថ្ងៃទី២០ ខែមករា ដែលជិតមកដល់របស់លោក Trump ក្រុមមេធាវីរបស់លោកនៅព្រឹកថ្ងៃចន្ទ បានស្នើលោកចៅក្រម Juan Merchan កុំទាន់សម្រេចទោសក្នុងពេលវេលាដ៏សំខាន់បែបនេះ។

នៅក្នុងសេចក្តីសម្រេចជាលាយលក្ខណ៍អក្សរនៅល្ងាចថ្ងៃចន្ទ លោក Merchan បាននិយាយថា សំណើរបស់លោក Trump ភាគច្រើនគឺ "ពាក្យដដែលៗនៃអំណះអំណាងដែលបានលើកឡើងជាច្រើនដងកាលពីមុន"។ ចៅក្រមរូបនេះបានបដិសេធមិនពន្យារការកាត់ទោសថ្ងៃទី១០ ខែមករា របស់លោក Trump ដែលជាកាលបរិច្ឆេទកំណត់រួចតាំងតែពីសប្តាហ៍មុនទេ។

ក្នុងការកំណត់ពេលវេលាកាត់ទោសសម្រាប់ថ្ងៃសុក្រនោះ លោកចៅក្រម Merchan បានបញ្ជាក់ថា លោកនឹងមិនញ្ជូនលោក Trump ចូលពន្ធនាគារឡើយ ហើយថា មានការកាត់ទោសប៉ុន្តែត្រូវដោះលែងដោយគ្មានលក្ខខណ្ឌ និងដាក់ការវិនិច្ឆ័យទោសកំហុសយ៉ាងមានប្រសិទ្ធភាពប៉ុន្តែគ្មានការផាកពិន័យ ឬការកាត់ទោសពិតប្រាកដ នឹងក្លាយជាវិធីសាស្រ្តជាក់ស្តែងបំផុត ដោយសារការចូលកាន់តំណែងរបស់លោក Trump ខិតកាន់តែជិត៕