ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បាននិយាយ កាលពីថ្ងៃចន្ទ ថា លោក និងមេដឹកនាំរបស់ប្រទេសចិន លោក Xi Jinping បានពិភាក្សាគ្នាតាមរយៈអ្នកតំណាង ហើយលោកជឿជាក់ថា មេដឹកនាំទាំងពីរ នឹងចុះសម្រុងគ្នា។

លោក Trump បាននិយាយនៅក្នុងបទសម្ភាសន៍មួយថា «យើងបានពិក្សាគ្នារួចហើយ។ យើងបានពិភាក្សាគ្នាតាមរយៈអ្នកតំណាង»។

លោក Trump ដែលនឹងចូលកាន់តំណែងនៅថ្ងៃទី ២០ ខែមករា បានចាត់ទុកលោក Xi ថាជាបុរសខ្លាំងនិងមានឥទ្ធិពល ជាអ្នកដែលលោកនិយាយថា ត្រូវបានគេគោរពនៅក្នុងប្រទេសចិន។

លោកនិយាយថា «ខ្ញុំគិតថា យើងប្រហែលជានឹងចុះសម្រុងគ្នាបានយ៉ាងល្អ»។ ប៉ុន្តែ វាត្រូវតែជាទំនាក់ទំនងទៅវិញទៅមក និងបាននិយាយឡើងវិញនូវការចោទប្រកាន់ថា ប្រទេសចិនបាននឹងកំពុង «បំផ្លាញ» សេដ្ឋកិច្ចរបស់សហរដ្ឋអាមេរិក។

លោក Trump បានអញ្ជើញលោក Xi និងមេដឹកនាំបរទេសផ្សេងទៀត ទៅចូលរួមពិធីឡើងកាន់តំណែងរបស់លោកនៅទីក្រុងវ៉ាស៊ីនតោននៅថ្ងៃទី២០ ខែមករា ប៉ុន្តែអ្នកជំនាញនិយាយថា មេដឹកនាំចិនទំនងជាមិនចូលរួមនោះទេ។

លោក Trump បានតែងតាំងអ្នកជំនួញចិនជាច្រើនឲ្យកាន់តំណែងសំខាន់ៗក្នុងរដ្ឋបាលនៅពេលខាងមុខរបស់លោក ។

លោក Trump និយាយថា លោកនឹងដាក់ពន្ធបន្ថែម១០ភាគរយលើមុខទំនិញរបស់ចិន លុះត្រាតែទីក្រុងប៉េកាំង ធ្វើអ្វីបន្ថែមទៀតដើម្បីបញ្ឈប់ការជួញដូរសារធាតុញៀនហ្វង់តានីល ដែលមានសារធាតុញៀនខ្លាំង។ លោក បានគំរាមដាក់ពន្ធលើសពី៦០ភាគរយលើទំនិញរបស់ប្រទេសចិន កាលពីពេលកំពុងធ្វើយុទ្ធនាការ។