យោងតាមសេចក្តីថ្លែងការណ៍ដែលបានចេញផ្សាយកាលពីថ្ងៃចន្ទ ទី៦ ខែ មករា បានឲ្យដឹងថា កងទ័ពអាកាសរបស់ប្រទេសប្រេស៊ីល (FAB) បានប្រកាសថា ខ្លួនបានបញ្ចប់ការស្រង់យក និងសុពលភាពនៃទិន្នន័យ ពីឧបករណ៍ថតសំឡេងលើជើងហោះហើរយន្តហោះធ្លាក់ Embraer 190 នៅប្រទេសកាហ្សាក់ស្ថាន ក្នុងខែធ្នូ នេះ ។

សេចក្តីថ្លែងការណ៍និយាយថា ការងារដើម្បីទាញយកទិន្នន័យពីម៉ាស៊ីនថតសំឡេងចំនួនពីរ នៅលើជើងហោះហើរ ត្រូវបានបញ្ចប់កាលពីថ្ងៃសៅរ៍ ទី៤ ខែមករា ហើយទិន្នន័យទាំងអស់ ត្រូវបានប្រគល់ទៅឱ្យអាជ្ញាធរស៊ើបអង្កេតរបស់ប្រទេសកាហ្សាក់ស្ថាន ជាទីភ្នាក់ងារទទួលខុសត្រូវក្នុងការវិភាគ និងស៊ើបអង្កេតឧបទ្ទវហេតុ។

ប្រតិបត្តិការ ត្រូវបានអនុវត្តដោយមន្ទីរពិសោធន៍អំណាន និងវិភាគឧបករណ៍ថតសំឡេងទិន្នន័យជើងហោះហើរ នៃមជ្ឈមណ្ឌលស៊ើបអង្កេត និងបង្ការឧបទ្ទវហេតុអាកាសចរណ៍ (CENIPA) ក្នុងទីក្រុង Brasilia ក្នុងការសហការជាមួយអង្គភាពស៊ើបអង្កេតឧបទ្ទវហេតុអាកាសចរណ៍នៃក្រសួងដឹកជញ្ជូនរបស់ប្រទេសកាហ្សាក់ស្ថាន។

ក្រុមអាជ្ញាធរក្នុងតំបន់បាននិយាយថា មនុស្សយ៉ាងហោចណាស់៣៨នាក់បានស្លាប់ បន្ទាប់ពីយន្តហោះដឹកអ្នកដំណើរចំនួន៦៧នាក់ពីប្រទេសអាស៊ែរបៃហ្សង់ទៅកាន់ភាគខាងត្បូងប្រទេសរុស្ស៊ី បានធ្លាក់នៅជិតទីក្រុង អោក តាវ(Aktau)ប្រទេសកាហ្សាក់ស្ថាន កាលពីថ្ងៃទី២៥ ខែធ្នូ។