អាជ្ញាធរ បាននិយាយកាលពីថ្ងៃចន្ទ ទី០៦ មករា ថា អ្នករុករករ៉ែច្រើននាក់ ត្រូវបានគេបារម្ភថា ជាប់នៅក្នុងអណ្តូងរ៉ែធ្យូងថ្ម នៅតំបន់ដាច់ស្រយាលមួយកន្លែងក្នុងរដ្ឋ Assam ភាគឦសានប្រទេសឥណ្ឌា ហើយរដ្ឋនេះ បានស្នើសុំជំនួយពីកងទ័ព ក្នុងប្រតិបត្តិការជួយសង្គ្រោះ។

គិតត្រឹមល្ងាចថ្ងៃចន្ទ ប្រតិបត្តិការជួយសង្គ្រោះបានដំណើរការ ហើយអាជ្ញាធរកំពុងស្វែងរកចំនួនពិតប្រាកដនៃអ្នកជាប់នៅក្នុងអណ្តូងរ៉ែ។

អណ្តូងរ៉ែនេះ ស្ថិតនៅក្នុងតំបន់ដាច់ស្រយាលមួយក្នុងស្រុក ឌីម៉ា ហាសៅ (Dima Hasao) ជាតំបន់ភ្នំនៅរដ្ឋ Assam ប្រទេសឥណ្ឌា។ ប្រព័ន្ធផ្សព្វផ្សាយក្នុងស្រុក បានរាយការណ៍ថា អ្នកជីករ៉ែ ត្រូវបានជាប់ក្នុងអណ្តូងដោយសារតែទឹកជំនន់។

រដ្ឋមន្ត្រីប្រចាំរដ្ឋ Assam លោក Himanta Biswa Sarma បានសរសេរនៅលើបណ្តាញ X ថា យើងបានស្នើសុំជំនួយកងទ័ពក្នុងប្រតិបត្តិការជួយសង្គ្រោះ ដែលកំពុងនៅដំណើរការ។

កងកម្លាំងឆ្លើយតបគ្រោះមហន្តរាយរដ្ឋ និងកងកម្លាំងឆ្លើយតបគ្រោះមហន្តរាយជាតិ (NDRF) ក៏កំពុងធ្វើដំណើរទៅកាន់កន្លែងកើតឧបទ្ទវហេតុដើម្បីជួយក្នុងកិច្ចខិតខំប្រឹងប្រែងសង្គ្រោះ។

នៅក្នុងគ្រោះមហន្តរាយធំបំផុតមួយ កាលពីឆ្នាំ២០១៩ កម្មករអណ្តូងរ៉ែ យ៉ាងហោចណាស់១៥ នាក់ត្រូវបានកប់ ខណៈកំពុងធ្វើការនៅក្នុងអណ្តូងរ៉ែខុសច្បាប់ក្នុងរដ្ឋ Meghalaya បន្ទាប់ពីទឹកពីទន្លេដែលនៅក្បែរនោះ បានជន់លិចអណ្តូងរ៉ែ។