រុស្ស៊ី បាននិយាយកាលពីថ្ងៃចន្ទ (០៦ មករា) ថា កងកម្លាំងរបស់ខ្លួនមានប្រៀបខ្លាំងនៅភាគខាងកើតអ៊ុយក្រែន ខណៈកំពុងបន្តទប់ទល់ការវាយលុកថ្មីរបស់អ៊ុយក្រែន នៅក្នុងតំបន់ Kursk នៃភាគខាងលិចរុស្ស៊ី ជាទីដែលការប្រយុទ្ធគ្នាយ៉ាងខ្លាំងក្លានៅថ្ងៃទីពីរកំពុងបន្ត។

ក្រសួងការពារជាតិរុស្ស៊ី បាននិយាយថា កងកម្លាំងរបស់ខ្លួនបានដណ្តើមយកទីប្រជុំជន Kurakhove ចម្ងាយ ៣២គីឡូម៉ែត្រ ភាគខាងត្បូងនៃទីក្រុង Pokrovsk ដែលជាមជ្ឈមណ្ឌលដឹកជញ្ជូនដ៏សំខាន់របស់អ៊ុយក្រែន ដែលកងកម្លាំងរុស្ស៊ី បានបន្តវាយរុលជាច្រើនខែ។

ជាុមួយគ្នានេះ ប្រធានាធិបតីអ៊ុយក្រែន លោក Volodymyr Zelenskiy បាននិយាយថា ទីក្រុងមូស្គូ រងការខាតបង់ដ៏ធំក្នុងពេល ៥ខែនៃការប្រយុទ្ធគ្នានៅក្នុងតំបន់ Kursk របស់រុស្ស៊ី ដែលមានកម្លាំងជិត ១៥.០០០នាក់ត្រូវបានសម្លាប់ ប៉ុន្តែមេដឹកនាំអ៊ុយក្រែនរូបនេះ មិនបានលើកឡើងពីតំបន់ Kurakhove ធ្លាក់ក្នុងដៃទីក្រុងមូស្គូ ទេ។

ក្រសួងរុស្ស៊ី និយាយថា ការយកបានទីប្រជុំជន Kurakhove នឹងអាចឱ្យកងកម្លាំងរបស់ខ្លួនបង្កើនល្បឿននៃការវាយរុលរបស់ពួកគេនៅក្នុងតំបន់ Donetsk របស់អ៊ុយក្រែន៕