បេសកជនពិសេសរបស់អង្គការសហប្រជាជាតិប្រចាំនៅយេម៉ែន លោក Hans Grundberg បានមកដល់រដ្ឋធានី Sanaaរបស់ប្រទេសនេះ ហើយកាលពីថ្ងៃចន្ទ ជាដំណើរទស្សនកិច្ចលើកដំបូងរបស់លោក ក្នុង    រយៈពេលជិតពីរឆ្នាំ ដែលជាផ្នែកនៃកិច្ចខិតខំប្រឹងប្រែង ដើម្បីជំរុញដំណើរការសន្តិភាពដែលជាប់គាំង។

ប្រភពមួយនៅអាកាសយានដ្ឋានអន្តរជាតិ Sanaa បានប្រាប់សារព័ត៌មានស៊ីនហួថា លោក Grundberg ដែលបានចុះពីយន្តហោះរបស់អង្គការសហប្រជាជាតិ ជាមួយនឹងក្រុមជំនួយការ ត្រូវបានទទួលស្វាគមន៍ដោយមន្ត្រីហ៊ួទី ហើយបានចាកចេញពីព្រលានយន្តហោះភ្លាមៗ ឆ្ពោះទៅភាគកណ្តាលទីក្រុងនេះ។

នៅក្នុងសេចក្តីថ្លែងការណ៍ខ្លីមួយ ដែលត្រូវបានបង្ហោះនៅលើបណ្តាញសង្គម X លោក Grundberg បានសង្កត់ធ្ងន់ថា ដំណើរទស្សនកិច្ចរបស់ខ្លួន មានគោលបំណង «ជំរុញឲ្យមានសកម្មភាពជាក់ស្តែង និងចាំបាច់» របស់ក្រុមហ៊ួទី ដើម្បីជំរុញដំណើរការសន្តិភាព។

បេសកជនរូបនេះ បានបញ្ជាក់ថា ដំណើរទស្សនកិច្ចរបស់លោក គឺជាផ្នែកមួយនៃ «ការបន្តកិច្ចខិតខំប្រឹងប្រែង ដើម្បីគាំទ្រដល់ការដោះលែងបុគ្គលិកអង្គការសហប្រជាជាតិ អង្គការក្រៅរដ្ឋាភិបាល សង្គមស៊ីវិល និងបេសកកម្មការទូ តដែលត្រូវបានឃុំខ្លួនដោយបំពាន»។

ដំណើរទស្សនកិច្ចរបស់លោក Grundberg ធ្វើឡើង បន្ទាប់ពីកិច្ចប្រជុំមួយកាលពីថ្ងៃអាទិត្យ នៅទីក្រុង Muscat នៃប្រទេសអូម៉ង់ ជាមួយប្រធានគណៈប្រតិភូចរចារបស់ក្រុមហ៊ួទី ជាកន្លែងដែលលោក បានបញ្ជាក់ឡើងវិញពីតម្រូវការសម្រាប់វិធានការជាក់ស្តែង ដើម្បីសម្រួលដល់កិច្ចចរចាសន្តិភាព។