រដ្ឋមន្ត្រីពាណិជ្ជកម្មថ្មីរបស់ប្រទេសនេះ បាននិយាយថា ប្រទេសស៊ីរី មិនអាចធ្វើកិច្ចព្រមព្រៀងនាំចូលប្រេងឥន្ធនៈ ស្រូវសាលី ឬទំនិញសំខាន់ៗផ្សេងទៀតបានទេ ដោយសារការដាក់ទណ្ឌកម្មដ៏តឹងរ៉ឹងរបស់សហរដ្ឋអាមេរិក ហើយទោះបីជាប្រទេសជាច្រើន រួមទាំងរដ្ឋឈូងសមុទ្រអារ៉ាប់ ចង់ធ្វើដូច្នេះក៏ដោយ។  

នៅក្នុងបទសម្ភាសន៍ជាមួយសារព័ត៌មានរ៉យទ័រ នៅការិយាល័យរបស់ខ្លួន ក្នុងទីក្រុងដាម៉ាស (Damascus) លោក Maher Khalil Al-Hasan បានលើកឡើងថា រដ្ឋបាលកាន់អំណាចថ្មីរបស់ប្រទេសស៊ីរី បានគ្រប់គ្រង ដើម្បីប្រមូលស្រូវសាលី និងប្រេងឥន្ធនៈឲ្យបានគ្រប់គ្រាន់ សម្រាប់រយៈពេលពីរបីខែ ប៉ុន្តែប្រទេសនេះ ប្រឈមនឹង «គ្រោះមហន្តរាយ» ប្រសិនបើទណ្ឌកម្ម មិនត្រូវបានបង្កក ឬដកចេញ ក្នុងពេលឆាប់ៗនេះទេ។ 

លោក Hasan គឺជាសមាជិកនៃរដ្ឋាភិបាលចាំផ្ទះថ្មី ដែលបង្កើតឡើងដោយក្រុមឧទ្ទាមឥស្លាម Hayat Tahrir Al-Sham បន្ទាប់ពីក្រុមនេះ បានបើកការវាយលុកយ៉ាងឆាប់រហ័សដែលបានផ្តួលរំលំប្រធានាធិបតីផ្តាច់ការ លោក បាសា អាល់អាសាដ (Bashar al-Assad) កាលពីថ្ងៃទី ០៨ ខែធ្នូ បន្ទាប់ពីសង្គ្រាមស៊ីវិលអស់រយៈពេល ១៣ឆ្នាំ។

ទណ្ឌកម្មទាំងអស់ ត្រូវបានដាក់ក្នុងអំឡុងពេលគ្រប់គ្រងរបស់លោក អាសាដ ដោយផ្តោតលើរដ្ឋាភិបាលរបស់លោក និងស្ថាប័នរដ្ឋ ដូចជាធនាគារកណ្តាលជាដើម។

ប្រទេសរុស្ស៊ី និងអ៊ីរ៉ង់ ដែលជាអ្នកគាំទ្រដ៏សំខាន់របស់រដ្ឋាភិបាលលោក អាសាដ ពីមុនបានផ្តល់ផលិតផលស្រូវសាលី និងប្រេងភាគច្រើនរបស់ប្រទេសស៊ីរី ប៉ុន្តែប្រទេសទាំងពីរ បានឈប់ធ្វើដូច្នេះ បន្ទាប់ពីក្រុមឧទ្ទាមដណ្តើមបានជ័យជម្នះ ហើយលោក អាសាដ បានភៀសខ្លួនទៅកាន់ទីក្រុងមូស្គូ។