ប្រធានាធិបតីទួរគី លោក រ៉េសិប តាយីប អឺដូហ្កាន់ ( Recep Tayyip Erdogan) កាលពីថ្ងៃចន្ទ បានចង្អុលបង្ហាញពីលទ្ធភាពនៃប្រតិបត្តិការយោធាឆ្លងព្រំដែនថ្មី នៅក្នុងប្រទេសស៊ីរី ប្រសិនបើប្រទេសនេះ យល់ឃើញថា មានការគំរាមកំហែងដល់សន្តិសុខជាតិរបស់ខ្លួន។

លោក អឺដូហ្កាន់ បាននិយាយបន្ទាប់ពីកិច្ចប្រជុំគណៈរដ្ឋមន្ត្រី នៅទីក្រុងអង់ការ៉ា ថា៖«ប្រទេសទួរគី បានបង្ហាញជាញឹកញាប់ថា ខ្លួនមានឆន្ទៈមិនសម្របសម្រួល ក្នុងការការពារឲ្យមានការគំរាមកំហែងតទៅទៀតទេ។ ប្រសិនបើឈានដល់ចំណុចនោះ យើងអាចចាត់វិធានការភ្លាមៗ មិនថា នៅពេលយប់ ឬពេលថ្ងៃនោះទេ»។

មេដឹកនាំទួរគីរូបនេះ ក៏បានលើកឡើងពីផលប៉ះពាល់ដ៏ទូលំទូលាយនៃការវិវឌ្ឍចុងក្រោយ នៅក្នុងប្រទេសស៊ីរី ដោយសង្កត់ធ្ងន់លើជំហររបស់ទួរគីប្រឆាំងនឹងការបែកបាក់នៃប្រទេសនេះ។

លោកបាននិយាយថា៖«យើងនឹងមិនយល់ព្រមចំពោះការបែកបាក់នៃប្រទេសស៊ីរី និងការរំខានដល់រចនា  សម្ព័ន្ធតែមួយរបស់ខ្លួន។ ប្រសិនបើយើងឃើញហានិភ័យក្នុងរឿងនេះ យើងនឹងចាត់វិធានការចាំបាច់យ៉ាងឆាប់រហ័ស»។

ប្រទេសទួរគី បានធ្វើប្រតិបត្តិការយោធាជាច្រើន នៅក្នុងប្រទេសស៊ីរី ចាប់តាំងពីឆ្នាំ ២០១៦ ដោយលើកឡើងពីការគំរាមកំហែងពីក្រុមប្រដាប់អាវុធឃើដ និងអស្ថិរភាព នៅតាមព្រំដែនរបស់ខ្លួន។