ក្រុមហ៊ុនប្រឹក្សាយោបល់របស់សហរដ្ឋអាមេរិក ព្រមានថា ឆ្នាំ២០២៥ នឹងក្លាយជាឆ្នាំដែលគ្រោះថ្នាក់បំផុតខាងភូមិសាស្ត្រនយោបាយ ចាប់តាំងពីសង្គ្រាមត្រជាក់ដំបូង។ ក្រុមអាស៊ីអឺរ៉ុប បានចេញផ្សាយរបាយការណ៍ឆ្នាំ២០២៥ ដែលមានហានិភ័យខ្ពស់ប្រចាំឆ្នាំរបស់ខ្លួន កាលពីថ្ងៃចន្ទ។ របាយការណ៍នេះត្រូវបានសរសេររួមគ្នាដោយប្រធានក្រុម លោក Ian Bremmer ។

លោក Bremmer បានលើកឡើងពីហានិភ័យមួយចំនួនក្នុងឆ្នាំនេះ ថាជាការមកដល់នៃពិភពលោក លែងមានក្រុមមេដឹកនាំ ឬហៅថា(G-Zero) ដែល «មនុស្សនៅគ្រប់ទីកន្លែង នឹងប្រឈមមុខទៅនឹងអស្ថិរភាពភូមិសាស្ត្រនយោបាយដែលកើនឡើង ជំរុញដោយកង្វះភាពជាអ្នកដឹកនាំពិភពលោក»។ លោកនិយាយថា «ជាលទ្ធផល យើងបានឈានចូលដល់សម័យកាលដ៏គ្រោះថ្នាក់នៃប្រវត្តិសាស្ត្រពិភពលោក ដូចគ្នាទៅនឹងទសវត្សរ៍ឆ្នាំ ១៩៣០ និងសង្រ្គាមត្រជាក់ដំបូង។

លោក Bremmer បានបញ្ជាក់ក្នុងបទសម្ភាសតាមអ៊ីនធឺណិតថា សហរដ្ឋអាមេរិក ជាប្រទេសដែលមានឥទ្ធិពលបំផុតលើពិភពលោក។ ប៉ុន្តែលោក បាននិយាយថា រដ្ឋបាលដែលនឹងចូលកាន់តំណែងនៅពេលខាងមុខរបស់ប្រធានាធិបតីជាប់ឆ្នោត លោក Donald Trump «បានណែនាំឆ្ពោះទៅរកឯកតោភាគីនិយមនៅលើឆាកពិភពលោក»។

លោកបាននិយាយថា នឹងមាន «វិធីសាស្រ្តប្រតិបត្តិការកាន់តែច្រើន ចំពោះគោលនយោបាយការបរទេស» ហើយ «ពហុភាគីនិយមដឹកនាំដោយសហរដ្ឋអាមេរិក និងការគាំទ្រសម្រាប់ស្ថាប័ន និងនីតិរដ្ឋសាកល» នឹងត្រូវបោះបង់ចោល។ 

ទាក់ទងនឹងប្រទេសចិន លោក Bremmer បាននិយាយថា ប្រទេសចិន «ផ្តោតការយកចិត្តទុកដាក់កាន់តែច្រើននៅផ្នែកខាងក្នុង» ហើយបានបង្ហាញថា ប្រទេសនេះនឹងត្រូវផ្តោតជាសំខាន់ដោយជៀសមិនរួច លើបញ្ហាសេដ្ឋកិច្ច និងបញ្ហាក្នុងស្រុក ។