កម្មវិធីស្បៀងអាហារពិភពលោករបស់អង្គការសហប្រជាជាតិ បាននិយាយកាលពីថ្ងៃចន្ទថា កងកម្លាំងអ៊ីស្រាអែល បានបើកការបាញ់ប្រហារទៅលើក្បួនរថយន្តរបស់ខ្លួនមួយ នៅក្នុងតំបន់ហ្កាហ្សារបស់ប៉ាឡេ   ស្ទីន ដែលត្រូវបានគេឡោមព័ទ្ធ នៅក្នុងអ្វីដែលខ្លួនហៅថា ជា «ឧប្បត្តិហេតុដ៏គួរឲ្យរន្ធត់»។

ទីភ្នាក់ងារនេះ បានអះអាងថា ក្បួនរថយន្តចំនួន ៣គ្រឿង ដែលដឹកបុគ្គលិកចំនួន ៨នាក់ពីភាគកណ្តាលតំបន់ហ្កាហ្សា ទៅកាន់ទីក្រុងហ្កាហ្សាភាគខាងជើង បានរងការវាយប្រហារដោយគ្រាប់កាំភ្លើងចំនួន ១៦ គ្រាប់ នៅជិតប៉ុស្តិ៍ត្រួតពិនិត្យ Wadi Gaza កាលពីថ្ងៃអាទិត្យ ដែលមិនបណ្តាលឲ្យមានអ្នករងរបួសទេ ប៉ុន្តែបានរារាំងក្បួនរថយន្តនេះ។

សេចក្តីថ្លែងការណ៍របស់អង្គការ WFP បានឲ្យដឹងថា រថយន្តទាំងនោះ ត្រូវបានស្លាកស្នាមយ៉ាងច្បាស់ ហើយបានទទួលការបោសសម្អាតសន្តិសុខជាមុន ពីអាជ្ញាធរអ៊ីស្រាអែល។

សេចក្តីថ្លែងការណ៍ បានបន្តថា៖«កម្មវិធីស្បៀងអាហារពិភពលោក (WFP) ថ្កោលទោសយ៉ាងដាច់ខាត ចំពោះឧប្បត្តិហេតុដ៏គួរឲ្យរន្ធត់ កាលពីថ្ងៃទី ០៥ ខែមករា»។

អង្គការ WFP បានលើកឡើងថា៖«ព្រឹត្តិការណ៍ដែលមិនអាចទទួលយកបាននេះ គឺគ្រាន់តែជាឧទាហរណ៍ចុងក្រោយបង្អស់នៃបរិយាកាសការងារដ៏ស្មុកស្មាញ និងគ្រោះថ្នាក់ ដែល WFP និងទីភ្នាក់ងារផ្សេងទៀតកំពុងប្រតិបត្តិការនាពេលបច្ចុប្បន្ននេះ» ដោយអំពាវនាវឲ្យមានការកែលម្អលក្ខខណ្ឌសន្តិសុខ ដើម្បីអនុញ្ញាតឲ្យជំនួយបន្តទៅទៀត។

យោធាអ៊ីស្រាអែល មិនបានឆ្លើយតបភ្លាមៗចំពោះសំណើសុំការអត្ថាធិប្បាយ ជុំវិញឧបទ្ទវហេតុនេះទេ។