រដ្ឋបាលប្រធានាធិបតីអាមេរិក លោក Joe Biden នឹងបង្វែរជំនួយយោធាចំនួន ៩៥លានដុល្លារ ដែលទុកសម្រាប់ផ្ដល់ឲ្យអេហ្ស៊ីប ទៅប្រទេសលីបង់ដែលត្រូវប្រឈមនឹងការគំរាមកំហែងពីក្រុមហេសបូឡា និងតួអង្គមិនមែនរដ្ឋផ្សេងទៀត ហើយកំពុងអនុវត្តបទឈប់បាញ់ជាមួយអ៊ីស្រាអែល។ នេះបើយោងតាមឯកសារដែលសារព័ត៌មាន Reuters បានឃើញ កាលពីថ្ងៃចន្ទ (ទី៦ ខែមករា)។

ការជូនដំណឹងរបស់ក្រសួងការបរទេសទៅកាន់សភា អំពីការផ្លាស់ប្តូរដែលបានគ្រោងទុកនេះ បានហៅកងកម្លាំងប្រដាប់អាវុធលីបង់ថា ជា «ដៃគូសំខាន់» ក្នុងការបន្តគាំទ្រកិច្ចព្រមព្រៀងអ៊ីស្រាអែល-លីបង់ ថ្ងៃទី២៧ ខែវិច្ឆិកា ឆ្នាំ២០២៤ ដើម្បីបញ្ឈប់អរិភាព និងដើម្បីទប់ស្កាត់ក្រុមហេសបូឡាកុំឲ្យគំរាមកំហែងដល់ប្រទេសអ៊ីស្រាអែល។

ចំណាត់ការនេះកើតមានឡើងបន្ទាប់ពីសមាជិកបក្សប្រជាធិបតេយ្យមួយចំនួនរបស់លោក Biden នៅក្នុងសភា បានសម្តែងការព្រួយបារម្ភយ៉ាងខ្លាំង អំពីកំណត់ត្រាសិទ្ធិមនុស្សរបស់ប្រទេសអេហ្ស៊ីប ជាពិសេសការចាប់ខ្លួនអ្នកទោសនយោបាយរាប់ពាន់នាក់។ ក្រសួងការបរទេស និងស្ថានទូតអេហ្ស៊ីប ប្រចាំនៅទីក្រុងវ៉ាស៊ីនតោន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។

កាលពីខែកញ្ញា ក្រសួងការបរទេសបានប្រាប់ឲ្យដឹងថា រដ្ឋបាលលោក Biden កំពុងមិនរឹតបន្តឹងលក្ខខណ្ឌផ្នែកសិទ្ធិមនុស្ស ដើម្បីផ្ដល់ជំនួយយោធាដល់អេហ្ស៊ីប ដោយបានធានាដល់ទីក្រុងគែរនូវជំនួយបម្រុងទុកទាំងស្រុងចំនួន ១,៣ពាន់លានដុល្លារ ក្នុងនោះរួមទាំង ៩៥លានដុល្លារ ដែលពាក់ព័ន្ធជាពិសេសទៅនឹងវឌ្ឍនភាពរបស់អេហ្ស៊ីប ជុំវិញការដោះលែងអ្នកទោសនយោបាយផងដែរ៕