ប្រធានាធិបតីបារាំងលោក អេម៉ានុយអែល ម៉ាក្រុង (Emmanuel Macron) បាននិយាយកាលពីថ្ងៃចន្ទថា លោកនៅតែរង់ចាំបណ្តារដ្ឋ នៅតំបន់Sahelរបស់ទ្វីបអាហ្រ្វិក ថ្លែងអំណរគុណដល់ទីក្រុងប៉ារីសសម្រាប់ការបញ្ឈប់ពួកគេមិនឲ្យធ្លាក់ទៅក្នុងកណ្តាប់ដៃក្រុមសកម្មប្រយុទ្ធ ហើយលោកបានច្រានចោលការលើកឡើងថា ប្រទេសរបស់លោក ត្រូវបានបង្ខំឲ្យចាកចេញពីតំបន់នេះ។

ថ្លែងទៅកាន់ឯកអគ្គរដ្ឋទូតបារាំង នៅក្នុងសន្និសីទប្រចាំឆ្នាំស្តីពីគោលនយោបាយការបរទេសសម្រាប់ឆ្នាំ ២០២៥ លោក ម៉ាក្រុង បានលើកឡើងថា ប្រទេសបារាំង មានសិទ្ធិធ្វើអន្តរាគមន៍ ក្នុងឆ្នាំ ២០១៣ ដើម្បីប្រយុទ្ធប្រឆាំងនឹងក្រុមសកម្មប្រយុទ្ធ ទោះបីជារដ្ឋដូចគ្នាទាំងនោះ បានដកខ្លួនចេញពីការគាំទ្រផ្នែកយោធារបស់បារាំងក៏ដោយ។

លោក ម៉ាក្រុង បាននិយាយដោយហួសចិត្តថា៖«ខ្ញុំគិតថា ពួកគេភ្លេចអរគុណយើង ប៉ុន្តែមិនអីទេ ពួកគេនឹងអរគុណ»។ ក្នុងរយៈពេលប៉ុន្មានឆ្នាំចុងក្រោយនេះ កងទ័ពបារាំង បានដកខ្លួនចេញពីប្រទេសម៉ាលី នីហ្សេ និងបួគីណាហ្វាសូ បន្ទាប់ពីរដ្ឋប្រហារយោធាជាបន្តបន្ទាប់ ហើយកំពុងស្ថិតក្នុងដំណើរការដកខ្លួនចេញពីប្រទេសឆាដ សេណេហ្គាល់ និងកូតឌីវ័រ។

លោកបានបន្ថែមថា៖«គ្មាននរណាម្នាក់ក្នុងចំណោមពួកគេ នឹងមានរដ្ឋអធិបតេយ្យនោះទេ ប្រសិនបើកងទ័ពបារាំង មិនបានដាក់ពង្រាយ នៅក្នុងតំបន់នេះ»។

លោក ម៉ាក្រុង បានច្រានចោលការលើកឡើងដែលថា ទីក្រុងប៉ារីសត្រូវបានបណ្តេញចេញពីតំបន់នេះ ដោយនិយាយថា ខ្លួនបានសម្រេចចិត្តរៀបចំយុទ្ធសាស្ត្រឡើងវិញ។