អ្នកនាំពាក្យយោធានៃចលនានេះ លោក Yahya Saree បាននិយាយថា ក្រុមឧទ្ទាមហ៊ួទីនៅប្រទេសយេ  ម៉ែន បានធ្វើការវាយប្រហារដោយមីស៊ីល និងយានដ្រូនរួមគ្នា ទៅលើនាវាផ្ទុកយន្តហោះ USS Harry Truman នៅសមុទ្រក្រហម។

អ្នកនាំពាក្យរូបនេះ បាននិយាយថា៖«កងកម្លាំងមីស៊ីល និងយានដ្រូនរបស់យេម៉ែន បានធ្វើប្រតិបត្តិការយោធារួមគ្នា ដោយបានវាយប្រហារលើនាវាផ្ទុកយន្តហោះ USS Harry Truman នៅតំបន់ភាគខាងជើងនៃសមុទ្រក្រហម ជាមួយនឹងមីស៊ីលតម្រង់គោលដៅចំនួនពីរគ្រឿង និងយានដ្រូនចំនួន ៤គ្រឿង។ នេះបើយោងតាមទូរទស្សន៍ Al Masirah TV។ 

យោងតាមលោក Saree បានឲ្យដឹងថា ក្នុងអំឡុងពេលនៃការវាយប្រហាររបស់ក្រុមហ៊ួទី ក្រុមនាវាផ្ទុកយន្តហោះអាមេរិកនេះ កំពុងរៀបចំវាយប្រហារលើទឹកដីយេម៉ែន ដែលគ្រប់គ្រងដោយក្រុមហ៊ួទី។

លោកបានបន្ថែមថា៖ «ប្រតិបត្តិការនេះ បានធ្វើឲ្យវាអាចរំខានដល់ការវាយប្រហារនោះ។

បន្ទាប់ពីការកើនឡើងភាពតានតឹងនៃជម្លោះប៉ាឡេស្ទីន-អ៊ីស្រាអែល នៅតំបន់ហ្កាហ្សាស្ទ្រីប ក្រុមហ៊ួទី បានព្រមានថា ពួកគេនឹងបើកការវាយប្រហារលើទឹកដីអ៊ីស្រាអែល ខណៈពេលដែលរារាំងនាវាដែលពាក់ព័ន្ធជាមួយរដ្ឋជ្វីហ្វ មិនឲ្យឆ្លងកាត់សមុទ្រក្រហម និងច្រកសមុទ្រ Bab el-Mandeb រហូតដល់ ទីក្រុង Tel Aviv បានបញ្ឈប់ប្រតិបត្តិការយោធារបស់ខ្លួនប្រឆាំងនឹងក្រុមសកម្មប្រយុទ្ធប៉ាឡេស្ទីនហាម៉ាស នៅក្នុងតំបន់ដែលកំពុងមានប្រយុទ្ធគ្នានេះ។ ចាប់តាំងពីខែវិច្ឆិកាឆ្នាំមុនមក ក្រុមហ៊ួទី បានវាយប្រហារលើនាវា  ស៊ីវិលរាប់សិបគ្រឿង នៅក្នុងសមុទ្រក្រហម និងឈូងសមុទ្រAden។