ភ្នំពេញ ៖ សមាគមអភិវឌ្ឍន៍សង្គមខ្មែរ និងសហគមន៍កសិកម្មក្នុងស្រុកមួយ ចុះអនុស្សារណៈលើកកម្ពស់លើការអភិវឌ្ឍន៍វិស័យកសិកម្ម ដល់កសិករក្នុងសហគមន៍ តាមរយៈការគាំទ្របច្ចេកទេស ការស្វែងរកទីផ្សារ និងការគៀងគរទុន ជួយឱ្យបានសម្រេចលើការដាំដុះ ដើម្បីចូលរួមលើកកម្ពស់សេដ្ឋកិច្ចគ្រួសារ និងសង្គម។

​ឯកឧត្តម ស្វាយ សុវណ្ណរិទ្ធ ប្រធានសមាគមអភិវឌ្ឍន៍សង្គមខ្មែរ លើកឡើងក្នុងពិធីចុះអនុស្សារណៈយោគយល់គ្នារវាង សមាគមអភិវឌ្ឍន៍សង្គមខ្មែរ ជាមួយសហគមន៍កសិកម្ម និងដំណាំកាកាវឃុំក្រពើរពីរ (ខេត្តពោធិ៍សាត់) និងក្រុមហ៊ុនជីកសិកម្ម នៅល្ងាចថ្ងៃទី ៦ មករា ម្សិលមិញនេះថា ជុំវិញវិស័យកសិកម្មនេះ រាជរដ្ឋាភិបាលបាននិងកំពុងយកចិត្តទុកដាក់យ៉ាងខ្លាំង ដោយបាន ផ្តល់ការគាំទ្រផ្នែកហិរញ្ញប្បទាន ការជំរុញផលិតកម្មក្នុងស្រុក ការផ្សព្វផ្សាយបច្ចេកទេស និងការជំរុញអនុវត្តកិច្ចព្រមព្រៀងពាណិជ្ជកម្ម នានា ដើម្បីគាំទ្រដល់ការដាំដុះដំណាំ និងការចិញ្ចឹមសត្វនៅកម្ពុជាឱ្យកាន់តែប្រសើរ។

ឯកឧត្តម បន្តថា ជាក់ស្តែងតាមរយៈនៃការចុះអនុស្សារណៈខាងលើនេះ សមាគមមានគោលដៅជួយដល់កសិករជំរុញការ ដំាដុះ ពិសេសដំណាំកាកាវ និងដំណំាផ្សេងៗទៀត ស្របតាមបច្ចេកទេស និងទទួលបានទិន្នផលខ្ពស់ ពោលគឺជំរុញការដាំដុះក្នុង គោលដៅធ្វើពាណិជ្ជកម្មតាមទីផ្សារ ដោយមានក្រុមហ៊ុនចាំទទួលទិញពីសហគមន៍។ ដែលបញ្ហានេះ គឺជាការលើកកម្ពស់ប្រជាកសិករ ក្នុងការដាំដុះ ដោយធ្វើការដាំដុះមិនប្រថុយប្រថាន ស្របតាមគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ដែល បាននិងកំពុងជំរុញលើកកម្ពស់ការធ្វើកសិកម្មទំនើប ។ ក្រៅពីការលើកកម្ពស់ការដាំដុះ សមាគមក៏ចង់ឃើញអ្នកប្រមូលទិញកសិផល កាកាវ មានទីផ្សារប្រមូលទិញជាបន្តបន្ទាប់ ដែលអនុវត្តតាមផលិតកម្ម កសិកម្មតាមកិច្ចសន្យា។

ឯកឧត្តម ស្វាយ សុវណ្ណរិទ្ធ បញ្ជាក់ឱ្យដឹងថា ចំពោះការចុះអនុស្សារណៈយោគយល់គ្នា ដើម្បីលើកកម្ពស់ការដាំដុះដំណាំកាកាវ និង ដំណាំផ្សេងៗទៀត រវាងសមាគមអភិវឌ្ឍន៍សង្គមខ្មែរ ជាមួយសហគមន៍កសិកម្ម និងដំណាំកាកាវឃុំក្រពើរពីរ និងក្រុមហ៊ុនជីកសិកម្ម នេះ គឺស្របពេលដែលកន្លងមក សមាគមអភិវឌ្ឍន៍សង្គមខ្មែរ បានចុះអនុស្សារណៈយោគយល់គ្នា ជាមួយអ្នកអភិវឌ្ឍន៍វិស័យកសិកម្ម ក្នុងស្រុកមួយ ដើម្បីលើកកម្ពស់ដល់ការដាំដុះដំណាំកាកាវ ដោយធ្វើយ៉ាងណាជំរុញការដាំដុះដំណំាប្រភេទនេះ ឱ្យក្លាយជាដំណាំមាន សក្តានុពល លើកកម្ពស់ដល់ជីវភាពគ្រួសារ និងការរចូលរួមអភិវឌ្ឍន៍វិស័យកសិកម្មនៅកម្ពុជា ខណៈនៅក្នុងឆ្នាំ ២០២៥ នេះ រាជរដ្ឋាភិ បាលរំពឹងថា វិស័យកសិកម្មនឹងមានកំណើន ១,១ ភាគរយ នៃផលិតផលសរុបក្នុងស្រុក៕

អត្ថបទ៖ សុន រ៉ាឌី