ភ្នំពេញ៖ ក្រសួងអភិវឌ្ឍន៍ជនបទ បានសម្រេចពន្លឿនការរៀបចំគោលនយោបាយជាតិអភិវឌ្ឍន៍ ឆ្នាំ២០២១-ឆ្នាំ២០៣០ ដើម្បីកែប្រែស្ថានភាពជីវភាព ស្ថានភាពសុខភាពការរស់នៅរបស់ជនជាតិភាគដើមភាគតិចកម្ពុជា និងពលរដ្ឋទូទៅនានានៅតាមតំបន់ជនបទ និងប្រែក្លាយតំបន់ជនបទនានានោះអោយទៅជាតំបន់ជនបទស៊ីវិល័យនៅឆ្នាំ២០៣០ ក្នុងនោះ ភូមិឋាននៃជនជាតិដើមភាគតិចក៏ទទួលផលប្រយោជន៍ពីការអភិវឌ្ឍដូចៗគ្នា។
នៅក្នុងពីធីបិទពិធីផ្សព្វផ្សាយរបាយការណ៍ជាតិ ស្តីពីស្ថានភាពប្រជាសាស្ត្រ និងសង្គម សេដ្ឋកិច្ច របស់ជនជាតិដើមភាគតិចកម្ពុជានៅសណ្ឋាគារហ៊ីម៉ាវ៉ារីនាថ្ងៃទី៤ ខែវិចិ្ឆកានេះ ឯកឧត្តម បណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទមានប្រសាសន៍ថា នៅក្នុងគោលនយោបាយជាតិអភិវឌ្ឍន៍ជនបទនោះ ក្រសួងបាននិងកំពុងគិតគូរ និងរៀបចំដាក់ចេញនូវផែនការសកម្មភាពចំនួន៥កម្មវិធី រួមមាន៖ ១. ការអភិវឌ្ឍន៍ជនបទ ២. ការអភិវឌ្ឍន៍សុខភាព និងកែលំអលក្ខខ័ណ្ឌរស់នៅជនបទ ៣. អភិវឌ្ឍន៍សហគមន៍ជនបទ ៤. អភិវឌ្ឍន៍ហេដ្ឋារចនាសម្ព័ន្ធរូបវ័ន្ត និងគមនាគមន៍ជនបទ ទី៥.ការអភិវឌ្ឍន៍គោលនយោបាយនិងពង្រឹងអភិបាលកិច្ច។
ឯកឧត្តម អ៊ុក រ៉ាប៊ុន បន្តថា នៅក្នុងកម្មវិធីអភិវឌ្ឍន៍នេះ ក្រសួង ក៏បានផ្តោតការគិតគូរខ្លាំងលើការងារអភិវឌ្ឍន៍ និងអភិរក្សជនជាតិដើមភាគតិចកម្ពុជាទាំងអស់ ដោយបានដាក់ចេញនូវផែនការសកម្មភាពសំខាន់មួយចំនួនរួមមាន៖ ទី១.ផ្សព្វផ្សាយ និងអនុវត្តគោលនយោបាយជាតិស្តីពីការអភិវឌ្ឍន៍និងអភិរក្សជនជាតិដើមភាគតិចអោយបានទូលំទូលាយ ទី២.សម្របសម្រួលប្រកាសស្វ័យអត្តសញ្ញាណនិងកំណត់អត្តសញ្ញាណក្រុមជនជាតិដើមភាគតិចនីមួយៗ ទី៣.បណ្តុះបណ្តាលជំនាញវិជ្ជាជីវៈ ទី៤. រៀបចំចងក្រងវប្បធម៌ប្រពៃណី ទំនៀមទំលាប់ ,ទី៥. កសាងហេដ្ឋារចនាសម្ព័ន្ធរូបវន្តនៅតំបន់ជនជាតិដើមភាគតិច និងទី៦.អភិវឌ្ឍន៍សេដ្ឋកិច្ចគ្រួសារ លើកកំពស់សុខភាពជាដើម។
ឯកឧត្តម បណ្ឌិតសភាចារ្យ អ៊ុក រ៉ាប៊ុន បន្តថា នៅសិក្ខាសាលារៀបចំគោលនយោបាយជាតិស្តីពីការអភិវឌ្ឍន៍ជនជាតិដើមភាគតិចចំនួន១៥លើកកន្លងមក ក្រសួងក៏បានចុះកំណត់អត្តសញ្ញាណ និងចេញលិខិតទទួលស្គាល់ភូមិឋានជនជាតិដើមភាគតិចបានប្រមាណ ១៥៥ភូមិ ស្មើនឹង៣៣%នៃចំនួនភូមិជនជាតិដើមភាគតិចសរុបចំនួន៤៥៥ភូមិ ហើយភូមិទាំងនោះមានមួយចំនួនធំ បានទទួលការអភិវឌ្ឍន៍និងបានដាក់រក្សាតុល្យភាពរវាងវប្បធម៌បុរាណ ការធ្វើទំនើបកម្មជនបទ និងការធានាសុខដុមនីយកម្មវប្បធម៌ ប្រពៃណី និងសាសនាផងដែរ។
បើតាមឯកឧត្តមកត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ បានថ្លែងថា មកដល់បច្ចុប្បន្ន ក្រសួងបានកំណត់អត្តសញ្ញាណជនជាតិដើមភាគតិចនៅកម្ពុជា បានចំនួន២២អំបូរ ដែលមានប្រជាជនសរុបជាង១៨ម៉ឺននាក់ ស្មើនឹង១.៣៤% នៃប្រជាជនកម្ពុជាសរុបនៅក្នុងឆ្នាំ២០០៨ ហើយចំនួននេះ មានកំណើនឡើងប្រមាណ ០.៥១% ក្នុងមួយឆ្នាំៗរៀងរាល់ឆ្នាំរហូតមកដល់បច្ចុប្បន្ន៕ អត្ថបទ៖ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
