ជាមួយនឹងសវនាការចោទប្រកាន់ទម្លាក់តំណែងជាផ្លូវការលើប្រធានាធិបតី លោក Yoon Suk Yeol ជិតដល់មួយសប្តាហ៍ ទាំងគណៈកម្មាធិការចោទប្រកាន់របស់រដ្ឋសភា និងអ្នកតំណាងស្របច្បាប់របស់លោក បានបង្កើនការទាមទាររបស់ពួកគេ ជុំវិញការឲ្យដកចេញនូវការចោទប្រកាន់ពីបទបះបោរ។

អំឡុងសវនាការត្រៀមលើកទី២ ដែលធ្វើឡើងនៅឯតុលាការធម្មនុញ្ញកូរ៉េខាងត្បូង នាថ្ងៃអង្គារ (ទី៧ ខែមករា) នេះ គណៈកម្មាធិការចោទប្រកាន់ទម្លាក់តំណែងរបស់រដ្ឋសភា បានប្រាប់ថា ខ្លួននឹងដកការចោទប្រកាន់ពីបទបះបោរចេញពីមូលដ្ឋានផ្លូវច្បាប់នៃការចោទប្រកាន់ទម្លាក់តំណែង ដើម្បីឲ្យចៅក្រុមអាចពន្លឿនការកាត់ក្តី។ គណៈកម្មាធិការបានបន្ថែមថា ការកាត់ក្តីគួរតែផ្តោតលើការរំលោភរដ្ឋធម្មនុញ្ញ ជាជាងស៊ើបរកបទល្មើសជាក់លាក់ ក្រោមច្បាប់ព្រហ្មទណ្ឌ។

ចាប់ពីនោះមក ការជជែកដេញដោលពាក់ព័ន្ធ បានរីករាលដាលរហូតដល់ក្រៅបន្ទប់តុលាការ។ តំណាងផ្លូវច្បាប់របស់លោក Yoon បានចេញសេចក្តីថ្លែងការណ៍មួយ នៅថ្ងៃទី៧ ខែមករានេះ ដោយលើកឡើងថា ការចោទប្រកាន់ទម្លាក់តំណែង គួរតែត្រូវបានច្រានចោលទាំងស្រុងភ្លាមៗតែម្ដង។

ក្រុមអ្នកច្បាប់របស់លោក Yoon បានទទួលស្គាល់ថា៖ «ការដកការចោទប្រកាន់ពីបទបះបោរ មិនមែនគ្រាន់តែជាការដកចេញនូវបទចោទប្រកាន់មួយ ក្នុងចំណោមការចោទប្រកាន់ ២ករណីប៉ុណ្ណោះទេ ប៉ុន្តែតំណាងឲ្យការដកចេញស្ទើរតែ ៨០% នៃខ្លឹមសាររបស់សេចក្ដីសម្រេចចោទប្រកាន់ទម្លាក់តំណែង»។

យោងតាមក្រុមរបស់លោក បានឲ្យដឹងថា សេចក្ដីសម្រេចចោទប្រកាន់ទម្លាក់តំណែង មានប្រវែង ៤០ទំព័រ។ ក្រុមនេះបានបញ្ជាក់ថា ក្នុងចំណោម ២៦ទំព័រ ដែលមិនបានរាប់បញ្ចូលសុន្ទរកថារបស់លោក Yoon និងក្រឹត្យច្បាប់អាជ្ញាសឹករបស់លោក ២១ទំព័រ ផ្តោតលើបញ្ហាទាក់ទងនឹងច្បាប់អាជ្ញាសឹក ដោយលើកហេតុផលថា មាតិកាដែលបានដកចេញមានចំនួន ៨០ភាគរយនៃសេចក្ដីសម្រេច។

ដោយចោទប្រកាន់គណៈកម្មាធិការចោទប្រកាន់ទម្លាក់តំណែងរបស់រដ្ឋសភាថា «ប្រឌិដ្ឋភាសាមិនសមហេតុផល និងធ្វើឲ្យយល់ខុស ក្នុងគោលបំណងបំភាន់សាធារណជន» ក្រុមការងារនេះបានលើកហេតុផលថា ប្រសិនបើបទចោទបះបោរ ក្រោមច្បាប់ព្រហ្មទណ្ឌ មិនមានទេនោះ ការចោទប្រកាន់ទម្លាក់តំណែងនេះ គឺមិនស្របច្បាប់ឡើយ។ ផ្ទុយទៅវិញ គណៈកម្មាធិការចោទប្រកាន់ទម្លាក់តំណេងរបស់រដ្ឋសភា បានប្រាប់អ្នកសារព័ត៌មាននៅថ្ងៃទី៧ មករានេះថា នឹងបន្តរក្សាជំហររបស់ខ្លួន៕