ទីភ្នាក់ងារសារព័ត៌មានរដ្ឋ SANA បានដកស្រង់សម្តីមន្ត្រីម្នាក់ ដែលបាននិយាយនៅថ្ងៃអង្គារ (ទី៧ ខែមករា) នេះថា ប្រទេសស៊ីរីនឹងទទួលបាននាវាផលិតអគ្គិសនីចំនួន ២គ្រឿង ពីប្រទេសទួរគី និងកាតា ដើម្បីបង្កើនការផ្គត់ផ្គង់ថាមពលដែលរងគ្រោះដោយការខូចខាតហេដ្ឋារចនាសម្ព័ន្ធ ក្នុងអំឡុងពេលការគ្រប់គ្រងរបស់អតីតប្រធានាធិបតី លោក Bashar al-Assad។

លោក Khaled Abu Dai អគ្គនាយកនៃស្ថាប័នទទួលបន្ទុកការបញ្ជូន និងចែកចាយអគ្គិសនី បានប្រាប់សារព័ត៌មាន SANA ថា នាវាទាំង២ នឹងផ្តល់ថាមពលអគ្គិសនីសរុបចំនួន ៨០០មេហ្គាវ៉ាត់ ប៉ុន្តែមិនបានបញ្ជាក់ពីរយៈពេលនោះទេ។

លោក Abu Dai បាននិយាយថា៖ «ទំហំនៃការខូចខាត ចំពោះស្ថានីយ៍ផលិត និងបំប្លែង និងបណ្តាញតភ្ជាប់អគ្គិសនី ក្នុងអំឡុងពេលនៃអតីតរបបនេះ គឺមានទំហំធំណាស់ ហើយយើងកំពុងស្វែងរកការស្តារឡើងវិញ ដើម្បីបញ្ជូនថាមពល»។

តែយ៉ាងណាក្ដី លោកមិនបាននិយាយថា តើស៊ីរីនឹងទទួលបាននាវាទាំង ២នេះ នៅពេលណានោះទេ។ សហរដ្ឋអាមេរិកកាលពីថ្ងៃចន្ទ បានចេញការលើកលែងទណ្ឌកម្ម សម្រាប់ប្រតិបត្តិការជាមួយស្ថាប័នគ្រប់គ្រងនៅស៊ីរី រយៈពេល ៦ខែ បន្ទាប់ពីការបញ្ចប់នូវរបបគ្រប់គ្រងរបស់លោក Assad ដើម្បីព្យាយាមបង្កើនលំហូរនៃជំនួយមនុស្សធម៌។

ការលើកលែងនេះអនុញ្ញាតឲ្យមានប្រតិបត្តិការថាមពលមួយចំនួន និងការផ្ទេរប្រាក់ផ្ទាល់ខ្លួនទៅកាន់ប្រទេសស៊ីរី រហូតដល់ថ្ងៃទី៧ ខែកក្កដា។ តែវិធានការនេះមិនបានលុបចោលទណ្ឌកម្មណាមួយឡើយ៕