យោធាអ៊ីស្រាអែលបានប្រាប់ឲ្យដឹងថា កងកម្លាំងអ៊ីស្រាអែលបានសម្លាប់ពួកសកម្មប្រយុទ្ធប៉ាឡេស្ទីនយ៉ាងហោចណាស់ ៣នាក់ នៅក្នុងប្រតិបត្តិការដែលត្រូវបានបង្កើនយ៉ាងខ្លាំងក្លា នៅទូទាំងតំបន់កាន់កាប់ West Bank នាថ្ងៃអង្គារ (ទី៧ ខែមករា) នេះ បន្ទាប់ពីមានការសម្លាប់ជនជាតិអ៊ីស្រាអែល ៣នាក់ នៅជិតកន្លែងតាំងទីលំនៅរបស់ជនជាតិជ្វីហ្វ។

ក្រសួងសុខាភិបាលប៉ាឡេស្ទីន បានប្រាប់ថា ក្មេងអាយុ ១៨ឆ្នាំម្នាក់ ត្រូវបានសម្លាប់ នាពេលយប់ អំឡុងការវាយប្រហារតាមអាកាសរបស់អ៊ីស្រាអែលលើទីក្រុងតូចមួយ Tamun នៅភាគឦសាននៃទីក្រុង Nablus ខណៈដែលបុរសអាយុ ៤០ឆ្នាំម្នាក់ ត្រូវបានបាញ់សម្លាប់ នៅក្នុងភូមិ Taluza ក្បែរនោះ។

យោធាអ៊ីស្រាអែល បានបន្តថា បន្ទាប់ពីការប៉ះទង្គិចគ្នាជាមួយពួកសកម្មប្រយុទ្ធ នៅក្នុងតំបន់នៃទីក្រុង Tamun យន្តហោះចម្បាំងរបស់ខ្លួន បានវាយប្រហារ និងសម្លាប់យុទ្ធជន ២នាក់។ ហើយទីភ្នាក់ងារសារព័ត៌មានផ្លូវការរបស់ប៉ាឡេស្ទីន WAFA ក៏បានរាយការណ៍ផងដែរថា ជនជាតិប៉ាឡេស្ទីនទី២ បានបាត់បង់ជីវិត នៅក្នុងការវាយប្រហារនៅទីក្រុង Tamun នោះ។

យោធាអ៊ីស្រាអែលបានបន្ថែមទៀតថា ជនសកម្មប្រយុទ្ធទី៣ ត្រូវបានសម្លាប់ អំឡុងការប្រយុទ្ធគ្នា នៅទីក្រុង Taluza ហើយជាច្រើននាក់ត្រូវបានចាប់ខ្លួន នៅក្នុងការប៉ះទង្គិចផ្សេងៗទៀត។ កងពលតូចប្រដាប់អាវុធ al-Qassam របស់ក្រុមហាម៉ាស បានបញ្ជាក់ថា បុរសដែលត្រូវបានសម្លាប់ នៅទីក្រុង Taluza គឺជាអ្នកប្រយុទ្ធម្នាក់ ក្នុងចំណោមយុទ្ធជនរបស់ខ្លួន៕