ក្រសួងពាណិជ្ជកម្មចិន នៅថ្ងៃអង្គារ (ទី៧ ខែមករា) នេះ បានលើកឡើងថា ប្រទេសចិនបានហៅសហរដ្ឋអាមេរិកថា «មិនមានការទទួលខុសត្រូវអ្វីសោះ» ពាក់ព័ន្ធទៅនឹង «ការសង្ស័យដោយគ្មានមូលដ្ឋាន» ដែលថា មានហានិភ័យសន្តិសុខព័ត៌មាន នៅក្នុងប្រព័ន្ធយានដ្រូនរបស់ប្រទេសចិន។

ប្រទេសចិនមានការមិនពេញចិត្តជាខ្លាំង និងប្រឆាំងយ៉ាងម៉ឺងម៉ាត់ ចំពោះការស៊ើបអង្កេតលើប្រព័ន្ធយានដ្រូនរបស់ខ្លួន ហើយបានប្រាប់ថា ខ្លួននឹងតាមដានស្ថានការណ៍នេះយ៉ាងដិតដល់។ ជាមួយគ្នានេះ ប្រទេសចិន ក៏បានជំរុញឲ្យសហរដ្ឋអាមេរិកគោរពការពិត និងបញ្ឈប់ជាបន្ទាន់នូវអ្វីដែលខ្លួនហៅថា «ការអនុវត្តខុស»។

គួរំលឹកថា ក្រសួងពាណិជ្ជកម្មអាមេរិក បានប្រាប់កាលពីថ្ងៃព្រហស្បតិ៍សប្ដាហ៍មុនថា ខ្លួនកំពុងពិចារណាលើច្បាប់ថ្មី ដែលនឹងរឹតបន្តឹងយានដ្រូនរបស់ចិន ដើម្បីដាក់កម្រិត ឬហាមឃាត់តែម្ដងមិនឲ្យមានវត្តមាននៅក្នុងសហរដ្ឋអាមេរិក ដោយលើកឡើងពីកង្វល់សន្តិសុខជាតិ៕