ចំហេះព្រៃ បានឆាបឆេះលើផ្ទៃដីជាង៨០ហិចតា និងបានគំរាមកំហែងដល់លំនៅឋាននៅតំបន់ជាយក្រុងដ៏ធំ នៃទីក្រុង Los Angeles រដ្ឋកាលីហ្វ័រនីញ៉ា កាលពីថ្ងៃអង្គារ ទី៧ ខែ មករា ដោយបានបង្ខំឱ្យមានការជម្លៀសប្រជាជនចេញ បន្ទាប់ពីក្រុមមន្ត្រីបានព្រមានរួចហើយអំពីគ្រោះថ្នាក់អគ្គិភ័យដ៏ខ្លាំងពីខ្យល់ស្ងួតមានកម្លាំងបក់ខ្លាំង។

រលកផ្សែងដ៏ក្រាស់ អាចត្រូវបានគេមើលឃើញកំពុងហុយចេញពីកូនភ្នំពីចម្ងាយជាច្រើនម៉ាយស៍ ខណៈ អណ្តាតភ្លើងបានគួចទៅរកលំនៅឋានជាច្រើនខ្នងដែលនៅក្បែរនោះ។

ចំហេះព្រៃ ត្រូវបានបញ្ឆេះដោយខ្យល់ក្តៅហើយស្ងួត មកពីវាលខ្សាច់ដីគោក ឆ្ពោះទៅកាន់ឆ្នេរសមុទ្រ។

អ្នកជម្លៀសខ្លួនមួយចំនួន បានចេញឆ្ងាយពីអគ្គិភ័យ ខណៈអ្នកខ្លះទៀត បានជាប់គាំងក្នុងចរាចរណ៍នៅក្នុងរថយន្តរបស់ពួកគេ ហើយមនុស្សមួយចំនួនទៀត បានទុកររថយន្តរបស់ពួកចោល ។

មុនពេលចំហេះព្រៃចាប់ផ្តើម ការិយាល័យសេវាអាកាសធាតុជាតិ បានចេញការព្រមានខ្ពស់បំផុតរបស់ខ្លួន សម្រាប់ស្ថានភាពចំហេះព្រៃខ្លាំង ភាគច្រើននៅតំបន់នៃទីក្រុង Los Angeles ចាប់ពីថ្ងៃអង្គារដល់ថ្ងៃព្រហស្បតិ៍ ដោយព្យាករណ៍ថាមានល្បឿនខ្យល់បក់ពី៥០ទៅ៨០ម៉ាយស៍ក្នុងមួយម៉ោង ហើយនោះរួមផ្សំជាមួយនឹងសំណើមទាប និងដើមរុក្ខជាតិស្ងួត ដោយសារតែខ្វះភ្លៀង។