រដ្ឋាភិបាលបណ្តោះអាសន្នរបស់ប្រទេសស៊ីរី បាននឹងកំពុងបង្កើនកិច្ចខិតខំប្រឹងប្រែងផ្នែកការទូតក្នុងរយៈពេលប៉ុន្មានសប្តាហ៍មកនេះ បន្ទាប់ពីការដួលរលំនៃរបបរបស់លោក Bashar al-Assad ។

លោក Asaad Hassan al-Shibani ជារដ្ឋមន្ត្រីការបរទេសសម្រាប់រដ្ឋាភិបាល ដឹកនាំដោយក្រុម Hayat Tahrir al-Sham លោកបានទៅធ្វើទស្សនកិច្ចនៅប្រទេសជិតខាងជាច្រើន រួមទាំងប្រទេសកាតា និងប្រទេសអារ៉ាប់រួម ហើយបានជួបសមភាគីរបស់ប្រទេសហ្សកដានី កាលពីថ្ងៃអង្គារ នៅទីក្រុង Amman ។

ក្នុងអំឡុងសន្និសីទសារព័ត៌មានរួមមួយ លោក al-Shibani បាននិយាយលើកឡើងអំពីការប្រកាសកាលពីពេលថ្មីៗនេះធ្វើឡើងដោយទីក្រុងវ៉ាស៊ីនតោន ថា ទីក្រុងវ៉ាស៊ីនតោន នឹងបន្ធូរបន្ថយទណ្ឌកម្មមួយចំនួន ដើម្បីផ្តល់ជំនួយមនុស្សធម៌។ លោកបាននិយាយថា «ការទម្លាយភាពទាល់ច្រកនេះ អាចត្រួសត្រាយផ្លូវសម្រាប់ការដកទណ្ឌកម្ម ប៉ុន្តែត្រូវតែដកចេញទាំងស្រុង ដើម្បីផ្តល់ឱ្យប្រជាជនស៊ីរី នូវឱកាសពេញលេញក្នុងការរស់នៅក្នុងសុខសន្តិភាព សន្តិសុខ និងវិបុលភាព»។

អង្គការសហប្រជាជាតិ បានប៉ាន់ប្រមាណថាមនុស្ស ១១៥.០០០នាក់ បានត្រឡប់ទៅប្រទេសស៊ីរីវិញចាប់តាំងពីការដួលរលំនៃរបបលោក Assad កាលពីខែមុន។

រដ្ឋាភិបាលបណ្តោះអាសន្ន កំពុងព្យាយាមរកជំនួយបរទេស ដើម្បីជួយស្តារប្រទេសស៊ីរីឡើងវិញ។

រដ្ឋាភិបាលនេះ ក៏កំពុងរៀបចំយោធាឡើងវិញ ខណៈក្រុមប្រដាប់អាវុធនៅទូទាំងប្រទេសស៊ីរី បានយល់ព្រមរំសាយ ហើយ រដ្ឋាភិបាលបានជំរុញឲ្យទាហាននៃអតីតរបបនេះ ប្រគល់អាវុធរបស់ពួកគេ។