ការស្ទង់មតិនៅក្នុងប្រទេសអ៊ុយក្រែន បានបង្ហាញថា ភាគរយនៃអ្នកឆ្លើយតបដែលជឿទុកចិត្តលើប្រធានាធិបតី លោក Volodymyr Zelenskyy បានឈានដល់ចំណុចទាបបំផុតចាប់តាំងពីការវាយលុករបស់រុស្ស៊ី ចាប់ផ្តើមនៅក្នុងឆ្នាំ២០២២។

វិទ្យាស្ថានសង្គមវិទ្យាអន្តរជាតិទីក្រុងគីវ កាលពីថ្ងៃអង្គារ បានចេញផ្សាយលទ្ធផលនៃការស្ទង់មតិ ដែលវិទ្យាស្ថាន បានធ្វើ កាលពីក្នុងខែធ្នូ ឆ្នាំមុន។

យោងតាមការស្ទង់មតិបានឲ្យដឹងថា ៥២ភាគរយនៃអ្នកឆ្លើយតបបាននិយាយថា ពួកគេទុកចិត្ត លោក Zelenskiy ដែលបានធ្លាក់ចុះ៧ភាគរយពីការស្ទង់មតិកាលពីពេលមុន ដែលបានធ្វើឡើងកាលពីក្នុងខែកញ្ញា។ ទន្ទឹមនឹងនេះ ៣៩ភាគរយ បាននិយាយថាពួកគេមិនជឿជាក់លើប្រធានាធិបតីរូបនេះទេ។

អ៊ុយក្រែន បានពន្យារពេលការបោះឆ្នោតប្រធានាធិបតី ដែលគ្រោងធ្វើនៅខែមីនា ឆ្នាំ២០២៤ ដោយសារតែការដាក់ច្បាប់អាជ្ញាសឹក បន្ទាប់ពីការវាយលុក។

ប្រព័ន្ធផ្សព្វផ្សាយអ៊ុយក្រែនមួយ បានរាយការណ៍ថា លោក Zelenskiy បាននិយាយថា «ខ្ញុំជឿជាក់ថា ការបោះឆ្នោតនឹងប្រព្រឹត្តទៅភ្លាមៗ បន្ទាប់ពីការបញ្ចប់ច្បាប់អាជ្ញាសឹក ដែលនេះអាស្រ័យលើច្បាប់» ។