ប្រភពពីក្រសួងការបរទេស បាននិយាយកាលពីថ្ងៃអង្គារថា ប្រទេសអាល្លឺម៉ង់ កំពុងដឹកនាំការពិភាក្សារបស់សហភាពអឺរ៉ុបស្តីពីការបន្ធូរបន្ថយទណ្ឌកម្ម ដែលបានដាក់លើរដ្ឋាភិបាលស៊ីរីរបស់ប្រធានាធិបតី លោក អាសា អាល់អាសាដ (Bashar al-Assad)ដែលបានដួលរលំហើយនោះ  និងការផ្តល់ជំនួយដល់ប្រជាជនរបស់ប្រទេសនេះ។

ប្រភពមួយបានអះអាងថា៖«យើងកំពុងពិភាក្សាយ៉ាងសកម្មនូវមធ្យោបាយ ដើម្បីផ្តល់ការបន្ធូរបន្ថយទណ្ឌកម្មដល់ប្រជាជនស៊ីរី ក្នុងវិស័យមួយចំនួន»។ ការបន្ធូរបន្ថយនេះ តម្រូវឲ្យមានការសម្រេចជាឯកច្ឆន្ទរបស់សហភាពអឺរ៉ុប។

ក្រសួងការបរទេសអាល្លឺម៉ង់ បានបដិសេធមិនធ្វើអត្ថាធិប្បាយទេ។

ការវាយលុកដ៏ឆាប់រហ័សរបស់ក្រុមឧទ្ទាម បានផ្តួលរំលំលោក អាសាដ កាលពីថ្ងៃទី ០៨ ខែធ្នូ ហើយក្រុម ឧទ្ទាមឥស្លាមនិយម Hayat Tahrir Al-Sham (HTS) ដែលបាននាំឲ្យមានរីកចម្រើនទៅមុខ បានបង្កើត  រដ្ឋាភិបាលចាំផ្ទះមួយ។

សហរដ្ឋអាមេរិកកាលពីថ្ងៃចន្ទ បានចេញការលើកលែងទណ្ឌកម្មរយៈពេល ៦ ខែ សម្រាប់ប្រតិបត្តិការជាមួយស្ថាប័នរដ្ឋាភិបាលមួយចំនួន ដើម្បីសម្រួលដល់លំហូរនៃជំនួយមនុស្សធម៌ ដោះស្រាយការខ្វះខាតថាមពលរបស់ប្រទេសស៊ីរី និងអនុញ្ញាតឲ្យមានការបញ្ចេញប្រាក់ផ្ទាល់ខ្លួន។

សហភាពអឺរ៉ុប សហរដ្ឋអាមេរិក ចក្រភពអង់គ្លេស និងរដ្ឋាភិបាលផ្សេងទៀត បានដាក់ទណ្ឌកម្មយ៉ាងតឹងរ៉ឹងលើប្រទេសស៊ីរី បន្ទាប់ពីការបង្រ្កាបរបស់លោក អាសាដ ទៅលើការតវ៉ាគាំទ្រលទ្ធិប្រជាធិបតេយ្យ នៅក្នុងឆ្នាំ ២០១១ បានក្លាយទៅជាសង្រ្គាមស៊ីវិល។