អង្គការសហប្រជាជាតិ និងប្រទេសលីបង់ កាលពីថ្ងៃអង្គារ បានបន្តអំពាវនាវជាថ្មី ដោយស្វែងរកជំនួយចំនួន ៣៧១, ៤ លានដុល្លារអាមេរិក ដើម្បីជួយជនស៊ីវិល ដែលរងផលប៉ះពាល់ដោយជម្លោះនាពេលថ្មីៗនេះ និងវិបត្តិមនុស្សធម៌ដែលកំពុងបន្ត។

លោកឧបនាយករដ្ឋមន្ត្រី Saadeh al-Shami និងអ្នកសម្របសម្រួលពិសេសរបស់អង្គការសហប្រជាជាតិសម្រាប់ប្រទេសលីបង់ លោក Imran Riza បានប្រកាសពីការបន្តអំពាវនាវនេះ ចាប់ពីខែមករា ដល់ខែ   មីនា ឆ្នាំ ២០២៥ នៅឯវិមានរដ្ឋាភិបាល Grand Serail ដែលជាការិយាល័យរបស់នាយករដ្ឋមន្ត្រីលីបង់ នៅក្នុងទីក្រុងបេរូត។

ផ្អែកលើការអំពាវនាវ នៅខែតុលា ឆ្នាំ ២០២៤ មូលនិធិនេះ ផ្តោតទៅលើពលរដ្ឋលីបង់ ជនភៀសខ្លួន និងជនអន្តោប្រវេសន៍ ដែលរងផលប៉ះពាល់ខ្លាំងបំផុតដោយវិបត្តិនេះ។

ជម្លោះដែលបានផ្ទុះឡើង នៅក្នុងខែតុលា ឆ្នាំ ២០២៣ និងកើនឡើងខ្លាំង នៅចុងឆ្នាំ ២០២៤ បានសម្លាប់មនុស្សជាង ៤.000នាក់  ១៦.000 នាក់រងរបួស និងជាងមួយលាននាក់ បានផ្លាស់ទីលំនៅ។ ដោយមនុស្ស ១២៥.០០០នាក់ នៅតែផ្លាស់ទីលំនៅ និងការបំផ្លិចបំផ្លាញយ៉ាងទូលំទូលាយ លោក Riza បានព្រមានពីតម្រូវការបន្ទាន់សម្រាប់ការគាំទ្រអន្តរជាតិ ដើម្បីទ្រទ្រង់កិច្ចខិតខំប្រឹងប្រែងជួយសង្គ្រោះជីវិតមនុស្ស។

ការអំពាវនាវនេះ ផ្តល់អាទិភាពដល់ស្បៀងអាហារ ជំនួយក្នុងរដូវរងា ការជួសជុលសង្គ្រោះបន្ទាន់ និងការការពារ ខណៈពេលដែលកំពុងដោះស្រាយការខ្វះខាតដ៏សំខាន់ នៅក្នុងការថែទាំសុខភាព ទឹក និងការ អប់រំ។