អាមេរិក៖ មនុស្ស ១៣នាក់ត្រូវបានបាញ់សម្លាប់នៅក្នុងសហរដ្ឋអាមេរិកក្នុងអំឡុងពេលពិធីបុណ្យ Halloween ចុងសប្ដាហ៍ ខណៈជម្លោះអំពើហិង្សាដោយអាវុធចេះតែបន្តកើតឡើងឥតឈប់ឈរ និងការស្លាប់នៅតែបន្តទូទាំងសហរដ្ឋអាមេរិក។ យោងតាមសារព័ត៌មានក្នុងស្រុកបានឱ្យដឹងថា មនុស្ស ២នាក់បានស្លាប់ និង ១២នាក់បានរងរបួសនៅក្នុងជាយក្រុងនៃទីក្រុង Chicago នៅពេលដែលបុរសប្រដាប់ដោយកាំភ្លើងបានបើកការបាញ់ប្រហារ លើពិធីជប់លៀងបែបប្រពៃណីនៅពេលយប់ជ្រៅ។
នៅទីក្រុង Albuquerque រដ្ឋ New Mexico នគរបាលកំពុងស៊ើបអង្កេតឧបទ្ទវហេតុបាញ់ប្រហារមួយ ដែលបានបណ្ដាលឲ្យមនុស្ស ២នាក់ស្លាប់ និង ៤នាក់ទៀតរងរបួស។ ចំនួនអ្នកស្លាប់កើនឡើងខ្ពស់គឺជារឿងធម្មតា។ កាលពីសប្ដាហ៍មុននៅទីក្រុង Boise រដ្ឋ Idaho ខ្មាន់កាំភ្លើងតែម្នាក់ឯងបានសម្លាប់មនុស្ស ២នាក់នៅផ្សារទំនើបមួយ និងជាច្រើននាក់ទៀតរងរបួស មុនពេលស្លាប់នៅក្នុងការបាញ់តបតជាមួយនគរបាល។ មនុស្សឃាតនៅសហរដ្ឋអាមេរិកកំពុងកើនឡើងនៅឆ្នាំ២០២១ នេះបន្ទាប់ពីកើនឡើងដល់ ១៩,៤០០នាក់ក្នុងឆ្នាំ២០២០ លើរលកនៃអំពើហិង្សាដោយអាវុធ។ បុរសជនជាតិអាមេរិកដើមកំណើតអាហ្វ្រិក George Floyd គ្មានអាវុធត្រូវបានសម្លាប់ ខណៈពេលដែលត្រូវបានចាប់ខ្លួនដោយនគរបាលទីក្រុង Minneapolis កាលពីថ្ងៃទី២៥ ខែឧសភា ឆ្នាំ២០២០។ វីដេអូរបស់អតីតមន្ត្រីនគរបាលក្រុង Minneapolis លោក Derek Chauvin បានចាប់ Floyd ដោយសង្កត់ជង្គង់នៅលើករបស់គេបានសាយភាពពេញបណ្ដាញសង្គម ហើយការតវ៉ាប្រឆាំងនឹងនគរបាលបានផ្ទុះឡើងកក្រើកទីក្រុងនានារបស់សហរដ្ឋអាមេរិក។
អត្រាមនុស្សឃាតមកពីទីក្រុងធំៗរបស់សហរដ្ឋអាមេរិកគឺមានចំនួនខ្ពស់។ ទីក្រុង Chicago ដែលជាទីក្រុងធំទី៣ របស់សហរដ្ឋអាមេរិក កំពុងស្ថិតក្នុងល្បឿននៃអត្រាឃាតកម្មដ៏អាក្រក់បំផុតក្នុងរយៈពេល ២៥ឆ្នាំដោយមានមនុស្សចំនួន ៦៤៩នាក់បានស្លាប់គិតត្រឹមពាក់កណ្តាលខែតុលា។ នៅទីក្រុង Houston រដ្ឋ Texas ដែលជាទីក្រុងធំជាងគេទី៤ របស់សហរដ្ឋអាមេរិក នគរបាលបានតាមដានករណីមនុស្សឃាតចំនួន ៣៣៩នាក់មកទល់ពេលនេះ កើនឡើងជាងអត្រានៃការសម្លាប់កាលពីឆ្នាំមុន។ រដ្ឋធានី Washington, DC របស់សហរដ្ឋអាមេរិកដែលមានអ្នកស្លាប់ចំនួន ១៨៣នាក់មកទល់ពេលនេះ នឹងមានចំនួនអ្នកស្លាប់លើសកាលពីឆ្នាំមុន ប្រសិនបើការសម្លាប់នៅតែបន្តក្នុងល្បឿនដូចគ្នានោះ៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
