ក្រសួងការបរទេសអ៊ីរ៉ង់ បានអំពាវនាវឲ្យទីក្រុងប៉ារីសពិនិត្យមើលឡើងវិញនូវវិធីសាស្រ្ត «មិនស្ថាបនា» របស់ខ្លួន ដោយការលើកឡើងនេះកើតមានប៉ុន្មានថ្ងៃមុនពេលទីក្រុងតេអេរ៉ង់ គ្រោងនឹងរៀបចំកិច្ចពិភាក្សាជុំថ្មី អំពីកម្មវិធីនុយក្លេអ៊ែររបស់ខ្លួន ជាមួយបណ្តាប្រទេសអឺរ៉ុបសំខាន់ៗ។

កាលពីថ្ងៃចន្ទដើមសប្ដាហ៍នេះ លោក Emmanuel Macron បាននិយាយថា កិច្ចប្រឹងប្រែងចម្រាញ់សារធាតុអ៊ុយរ៉ានីញ៉ូមរបស់ទីក្រុងតេអេរ៉ង់ ជិតដល់ចំណុចមិនអាចបកក្រោយវិញបាន ហើយបានព្រមានថា បណ្ដាប្រទេសដៃគូអឺរ៉ុប នៅក្នុងកិច្ចព្រមព្រៀងនុយក្លេអ៊ែរ ឆ្នាំ២០១៥ ដែលលែងមានប្រសិទ្ធភាពជាមួយអ៊ីរ៉ង់ គួរតែពិចារណាដល់ការដាក់ទណ្ឌកម្មឡើងវិញ ប្រសិនបើគ្មានវឌ្ឍនភាពអ្វីជាវិជ្ជមានទេនោះ។

នៅថ្ងៃពុធ (ទី៨ ខែមករា) នេះ អ្នកនាំពាក្យក្រសួងការបរទេសលោក Esmaeil Baghaei បានសរសេរនៅលើបណ្ដញសង្គម X ថា៖ «ការអះអាងមិនពិតដោយរដ្ឋាភិបាល ដែលខ្លួនឯងផ្ទាល់បានបដិសេធមិនបំពេញកាតព្វកិច្ចរបស់ខ្លួន ក្រោមកិច្ចព្រមព្រៀងនុយក្លេអ៊ែរ ហើយបានដើរតួនាទីយ៉ាងសំខាន់ ក្នុងការទិញអាវុធនុយក្លេអ៊ែរ (របស់អ៊ីស្រាអែល) គឺជាការបោកបញ្ឆោត និងជាការប៉ាន់ស្មាន»។

គួររំលឹកថា បារាំង អាល្លឺម៉ង់ និងអង់គ្លេស គឺជាប្រទេសហត្ថលេខីរួមនៃកិច្ចព្រមព្រៀងឆ្នាំ២០១៥ ដែលអ៊ីរ៉ង់ បានយល់ព្រមទប់ស្កាត់ការចម្រាញ់របស់ខ្លួន ពោលគឺជាអ្វីដែលលោកខាងលិចមើលឃើញថា ជាកិច្ចប្រឹងប្រែងក្លែងបន្លំ ដើម្បីអភិវឌ្ឍសមត្ថភាពអាវុធនុយក្លេអ៊ែរ ជាថ្នូរនឹងការដកទណ្ឌកម្មអន្តរជាតិ។

អ្នកការទូតបារាំង អាល្លឺម៉ង់ និងអង់គ្លេស គ្រោងនឹងបើកកិច្ចប្រជុំបន្ត ជាមួយសមភាគីអ៊ីរ៉ង់ នៅថ្ងៃទី១៣ ខែមករា បន្ទាប់ពីមានជំនួបមួយ ក្នុងខែវិច្ឆិកា ដែលត្រូវបានរៀបចំឡើង ក្នុងគោលបំណងពិភាក្សា អំពីលទ្ធភាពនៃការចរចាប្រាកដប្រាជា ក្នុងរយៈពេលប៉ុន្មានខែខាងមុខ ដើម្បីកាត់បន្ថយភាពតានតឹងជាមួយទីក្រុងតេអេរ៉ង់ ខណៈដែលលោក Donald Trump ដែលដកសហរដ្ឋអាមេរិកពីកិច្ចព្រមព្រៀង ឆ្នាំ២០១៥ អំឡុងអាណត្តិដំបូងរបស់លោក គ្រោងវិលទៅកាន់សេតវិមានវិញ នៅថ្ងៃទី២០ ខែមករា។

លោក Baghaei មិនបានលើកឡើងនោះឡើយពីការអត្ថាធិប្បាយរបស់រដ្ឋមន្ត្រីការបរទេសបារាំង លោក Jean-Noel Barrot ទាក់ទងនឹងពលរដ្ឋបារាំង ៣នាក់ដែលជាប់ឃុំខ្លួន នៅអ៊ីរ៉ង់។ លោក Barrot បាននិយាយកាលពីថ្ងៃអង្គារថា ទំនាក់ទំនងនាពេលអនាគត និងការដកទណ្ឌកម្មណាមួយលើអ៊ីរ៉ង់ នឹងអាស្រ័យលើការដោះលែងអ្នកទាំងនោះ៕