ប្រមុខគោលនយោបាយបម្រែបម្រួលអាកាសធាតុរបស់សហភាពអឺរ៉ុប (EU) បានព្រមានថា កិច្ចប្រឹងប្រែងជាសកល ដើម្បីដោះស្រាយបញ្ហាប្រែប្រួលអាកាសធាតុ នឹងត្រូវប្រឈមជាមួយបញ្ហាធ្ងន់ធ្ងរ ប្រសិនបើប្រធានាធិបតីជាប់ឆ្នោតរបស់សហរដ្ឋអាមេរិកលោក Donald Trump ដកប្រទេសចេញពីកិច្ចព្រមព្រៀងទីក្រុងប៉ារីសម្តងទៀត។

បើយោងតាមប្រភពពីក្នុងក្រុម បានឲ្យដឹងថា ក្រុមអន្តរកាលរបស់លោក Trump បានរៀបចំក្រឹត្យច្បាប់ ដើម្បីដកសហរដ្ឋអាមេរិកដែលបច្ចុប្បន្នជាប្រទេសបំពុលធំបំផុតទី២ របស់ពិភពលោក បន្ទាប់ពីប្រទេសចិន ចេញពីសន្ធិសញ្ញាពិភពលោកដ៏សំខាន់ ស្តីពីការប្រែប្រួលអាកាសធាតុ។

នៅក្នុងបទសម្ភាសន៍មួយ ស្នងការអាកាសធាតុរបស់ EU លោក Wopke Hoekstra បានប្រាប់សារព័ត៌មាន Reuters ថា៖ «ប្រសិនបើរឿងនោះកើតឡើង នោះនឹងក្លាយជាផលប៉ះពាល់ដ៏ធ្ងន់ធ្ងរមួយ សម្រាប់ផ្នែកការទូតអាកាសធាតុអន្តរជាតិ។

លោកបានបន្ថែមថា ការចាកចេញរបស់សហរដ្ឋអាមេរិកមួយផ្សេងទៀត ពីកិច្ចព្រមព្រៀងទីក្រុងប៉ារីស នឹងតម្រូវឲ្យប្រទេសផ្សេងទៀត «បង្កើនកិច្ចប្រឹងប្រែងទ្វេដងលើកិច្ចការការទូតអាកាសធាតុ» ជាការឆ្លើយតប។

កិច្ចព្រមព្រៀងទីក្រុងប៉ារីស គឺជាចំណុចស្នូលនៃការចរចាអាកាសធាតុរបស់អង្គការសហប្រជាជាតិ ដែលប្រទេសជិត ២០០ ពិភាក្សាគ្នា អំពីវិធានការនានា ដើម្បីទប់ស្កាត់ការបំភាយឧស្ម័ន និងការផ្តល់មូលនិធិ ដើម្បីចំណាយ សម្រាប់កិច្ចខិតខំប្រឹងប្រែងទាំងនេះ។

ការផ្លាស់ប្តូរមួយត្រូវបានរំពឹងទុក នៅក្រោមការគ្រប់គ្រងរបស់លោក Trump ដែលត្រូវវិលទៅសេតវិមានវិញ នៅថ្ងៃទី២០ ខែមករា។ លោកបានហៅបម្រែបម្រួលអាកាសធាតុថា ជាការបោកបញ្ឆោត ហើយបានដកខ្លួនចេញពីកិច្ចព្រមព្រៀងប៉ារីស ក្នុងអំឡុងពេលអាណត្តិដំបូងរបស់លោក ពីឆ្នាំ២០១៧ ដល់ឆ្នាំ២០២១៕