រដ្ឋមន្ត្រីការបរទេសទួរគី លោក Hakan Fidan បាននិយាយថា កិច្ចសហប្រតិបត្តិការរបស់ប្រទេសលោកជាមួយរុស្ស៊ី និងអ៊ីរ៉ង់ បានបន្ត ទោះបីជាស្ថិតក្នុងស្ថានភាពលំបាកបំផុតក៏ដោយ។

លោកបានថ្លែងបែបនេះនៅលើកញ្ចក់ទូរទស្សន៍ CNN Turk ដោយឆ្លើយសំណួរអំពីទំនាក់ទំនងរបស់ទីក្រុងអង់ការ៉ា ជាមួយទីក្រុងមូស្គូ និងទីក្រុងតេអេរ៉ង់ ទាក់ទងនឹងស្ថានភាព នៅក្នុងប្រទេសស៊ីរី។

លោករដ្ឋមន្ត្រី បាននិយាយថា៖«កិច្ចសហប្រតិបត្តិការរបស់យើងជាមួយរុស្ស៊ី និងអ៊ីរ៉ង់ បានបន្ត បើទោះបីជាស្ថិតនៅក្នុងគ្រាដ៏លំបាកបំផុតក្តី។ យើងជារដ្ឋដែលមានភាពចាស់ទុំ យើងដឹងពីរបៀបបំបែកបញ្ហាចេញពីផ្នែកផ្សេងទៀតនៃទំនាក់ទំនងរបស់យើង ហើយបន្តទៅមុខ។ យើងគឺជាតួអង្គនៅផ្នែកផ្សេងៗនៃវិបត្តិដ៏ធំ នៅក្នុងប្រទេសស៊ីរី យើងមានជម្លោះនៅទីនោះ ប៉ុន្តែយើងបានបន្តកិច្ចសហប្រតិបត្តិការលើបញ្ហាផ្សេងទៀត ទាំងនេះ គឺជាទំនាក់ទំនងដ៏ចាស់ទុំ និងអាកប្បកិរិយាគោលនយោបាយការបរទេស ដែលមានភាពចាស់ទុំ ដែលមានប្រទេសតិចតួចណាស់ ដែលមានសមត្ថភាពធ្វើបែបនេះ។

ដោយនិយាយសំដៅទំនាក់ទំនងរវាងទីក្រុងអង់ការ៉ា និងទីក្រុងមូស្គូ លោកបានរំលឹកថា រដ្ឋទាំងពីរ បានអភិវឌ្ឍន៍ទំនាក់ទំនងអ្នកជិតខាងល្អ និងកំពុងសហការក្នុងវិស័យផ្សេងៗ។