​

ទីភ្នាក់ងារផ្តល់ជំនួយរបស់អង្គការសហប្រជាជាតិ បាននិយាយកាលពីថ្ងៃអង្គារថា អង្គការមនុស្សធម៌របស់អង្គការសហប្រជាជាតិ និងដៃគូរបស់ខ្លួន បានចែកចាយជំនួយស្បៀងអាហារដល់ប្រជាជនជិត៣លាននាក់ នៅក្នុងប្រទេសស៊ីរី ចាប់តាំងពីចុងខែវិច្ឆិកាមក។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បាននិយាយថា «ប្រជាជនជាង២,៥លាននាក់នៅទូទាំងប្រទេស រួមមានប្រជាជននៅក្នុងជំរំ មជ្ឈមណ្ឌលរួម និងសហគមន៍ទទួលជនភៀសខ្លួន បានទទួលនំប៉័ងនៅចន្លោះថ្ងៃទី២៧ ខែវិច្ឆិកា ដល់ ថ្ងៃទី៦ ខែមករា» ។

ប្រជាជនជាង ៣០០.០០០នាក់ បានទទួលជំនួយស្បៀងអាហារផ្សេងៗ រួមមានរបបអាហារបម្រុង អាហារក្តៅ និងកញ្ចប់ស្បៀអាហារ។ ទោះជាយ៉ាងណា អង្គការ OCHA បាននិយាយថា ពួកគេបន្តការដឹកជញ្ជូន ក្នុងលក្ខខណ្ឌសុវត្ថិភាព និងការអនុញ្ញាតដឹកជញ្ជូន។

ការិយាល័យនេះ បាននិយាយថា នៅភាគពាយព្យប្រទេសស៊ីរី ដៃគូនានាបានគាំទ្រដល់កសិករ និងអ្នកបង្កាត់ពូជសត្វ ដោយការនាំចូលផ្នែកកសិកម្ម ដូចជាជី និងជំនួយជាប្រាក់ ដើម្បីជួយដល់សហគ្រាសធុនតូច និងមធ្យម។ អង្គការ OCHA បាននិយាយថា «អសន្តិសុខ និងការភៀសខ្លួន នៅក្នុងខែវិច្ឆិកា និងខែធ្នូ ស្របពេលនឹងរដូវដាំដុះកសិកម្ម»។

គ្រួសារកសិករជាច្រើន កំពុងត្រូវការ ការនាំចូលកសិកម្មយ៉ាងខ្លាំង រួមមានគ្រាប់ពូជ ជី និងចំណីសត្វ។ ទន្ទឹមនឹងនេះ ទឹកភ្លៀង មានកម្រិតកាន់តែទាបជាងកម្រិតមធ្យម និងខុសប្រក្រតី ក្នុងរយៈពេលប៉ុន្មានសប្តាហ៍កន្លងទៅនេះ។

ដៃគូមនុស្សធម៌ បានព្រមានថា បើគ្មានការជួយឧបត្ថម្ភបន្ថែមនោះទេ ការផលិតស្រូវសាលី នៅឆ្នាំ ២០២៥នេះ នឹងរងផលប៉ះពាល់ធ្ងន់ធ្ងរនៅក្នុងប្រទេសដែលប្រជាជន១៥លាននាក់ ជួបអសន្តិសុខស្បៀងរួចហើយ។