មេដឹកនាំគណបក្សប្រឆាំងរបស់អាល្លឺម៉ង់ លោក Friedrich Merz ដែលត្រូវបានគេរំពឹងថា នឹងក្លាយជាអធិការបតី នៅក្នុងការបោះឆ្នោតខែកុម្ភៈនោះ បាននិយាយថា ប្រទេសអាល្លឺម៉ង់ នឹងចំណាយបន្ថែមទៀតលើវិស័យការពារជាតិ ប៉ុន្តែនឹងមិនប្តេជ្ញាធ្វើតាមគោលដៅការចំណាយផ្នែកការពារជាតិរបស់អង្គការណាតូ (NATO) ដូចដែលប្រធានាធិបតីជាប់ឆ្នោតអាមេរិក លោក Donald Trump បានអំពាវនាវនោះឡើយ។

នៅថ្ងៃពុធ (ទី៨ ខែមករា) នេះ ដើម្បីឆ្លើយតបទៅនឹងការអំពាវនាវរបស់លោក Trump ដែលចង់ឲ្យសមាជិកអង្គការណាតូចំណាយ ៥ភាគរយនៃផលិតផលក្នុងស្រុកសរុប (GDP) លើវិស័យការពារជាតិ លោក Merz បានប្រាប់ទូរទស្សន៍ Bayerischer Rundfunk ថា៖ «ដំបូងយើងពិតជាត្រូវឈានឲ្យដល់កម្រិតទាបជាង ២ភាគរយ ក្នុងប្រទេសអាល្លឺម៉ង់។ យើងមិនទាន់ឈានដល់កម្រិតនោះទេ»។

មេដឹកនាំគណបក្សប្រឆាំង Christian Democrats (KD) លោក Merz ដែលត្រូវបានចាត់ទុកថា មានសិទ្ធខ្ពស់ក្នុងការបន្តតំណែងរបស់លោក Olaf Scholz បានបន្ថែមថា៖ «(គោលដៅ) ២ ៣ ឬ ៥ភាគរយ មិនមានពាក់ព័ន្ធគ្នាជាអ្វីសំខាន់នោះឡើយ។ កត្តាដ៏សំខាន់បំផុត គឺថា យើងធ្វើអ្វីដែលចាំបាច់ ដើម្បីការពារខ្លួន»។

លោក Trump បានរអ៊ូរទាំជាញឹកញាប់ថា សមាជិកអង្គការណាតូភាគច្រើន មិនបានបង់ចំណែករបស់ខ្លួនដោយយុត្តិធម៌នោះឡើយ ហើយលោកបានលើកឡើងពីការទាមទារឲ្យបង្កើនការរួមចំណែកការពារជាតិរបស់អង្គការណាតូ ក្នុងអំឡុងពេលធ្វើយុទ្ធនាការបោះឆ្នោត។

អង្គការណាតូ បានប៉ាន់ប្រមាណថា ២៣ប្រទេស ក្នុងចំណោមសមាជិកទាំង ៣២ របស់ខ្លួន នឹងបំពេញតាមគោលដៅ ក្នុងការចំណាយ ២ភាគរយនៃផលិតផលក្នុងស្រុកសរុប ក្នុងឆ្នាំ២០២៤៕