ការិយាល័យនាយករដ្ឋមន្រ្តីអ៊ីតាលីលោកស្រី Giorgia Meloni បាននិយាយនៅក្នុងសេចក្តីថ្លែងការណ៍នៅថ្ងៃពុធនេះថា អ្នកសារព័ត៌មានអ៊ីតាលីនាង Cecilia Sala ត្រូវបានដោះលែងពីមន្ទីរឃុំឃាំងនៅប្រទេសអ៊ីរ៉ង់ ហើយនាងកំពុងធ្វើដំណើរមកកាន់ផ្ទះវិញ ។

នាង Sala វ័យ ២៩ឆ្នាំ ដែលបានធ្វើការក្រោមទិដ្ឋាការអ្នកសារព័ត៌មានធម្មតានោះ ត្រូវបានឃាត់ខ្លួននៅក្នុងទីក្រុងតេអេរ៉ង់ កាលពីថ្ងៃទី ១៩ ខែធ្នូកន្លងទៅ ហើយត្រូវបានឃុំឃាំងតែម្នាក់ឯងក្នុងពន្ធនាគារ Evin ស្ថិតនៅរដ្ឋធានីប្រទេសអ៊ីរ៉ង់ ។

នាង Sala ត្រូវបានឃាត់ខ្លួន រយៈពេល ៣ថ្ងៃក្រោយអ្នកជំនួញអ៊ីរ៉ង់លោក Mohammad Abedini ត្រូវបានចាប់ខ្លួននៅអាកាសយានដ្ឋាន Malpensa ស្ថិតក្នុងទីក្រុង Milan ក្រោមដីកាសហរដ្ឋអាមេរិកសម្រាប់ការចោទប្រកាន់ថា បានផ្គត់ផ្គង់គ្រឿងបង្គុំយានដ្រូន ដែលទីក្រុងវ៉ាស៊ីនតោននិយាយថា ត្រូវបានប្រើប្រាស់នៅក្នុងការវាយប្រហារឆ្នាំ ២០២៤ ដោយបានសម្លាប់ទាហានសហរដ្ឋអាមេរិក ៣រូបនៅក្នុងប្រទេសហ្សកដានី ។

សេចក្តីថ្លែងការណ៍ការិយាល័យនាយករដ្ឋមន្រ្តីអ៊ីតាលីបន្តថា នាង Salaត្រូវបានដោះលែងដោយសារការងារដ៏ស្វិតស្វាញតាមបណ្តាញការទូត និងចារកម្ម ។ ពួកគេពុំបានអះអាងពីករណីរបស់លោក Abedini នោះទេ ។

នៅក្នុងរយៈពេលប៉ុន្មានឆ្នាំចុងក្រោយនេះ កងកម្លាំងសន្តិសុខអ៊ីរ៉ង់ បានចាប់ខ្លួនជនបរទេសរាប់សិបនាក់ និងមនុស្ស ២សញ្ជាតិ ដែលភាគច្រើនលើការចោទប្រកាន់ពាក់ព័ន្ធនឹងចារកម្ម និងសន្តិសុខ ។ 

ក្រុមសិទ្ធិមនុស្ស បានចោទប្រកាន់អ៊ីរ៉ង់ថា បានព្យាយាមទាញយកសម្បទានពីប្រទេសដទៃ តាមរយៈការចាប់ខ្លួនបែបនេះ គឺជាការចោទប្រកាន់មួយដែលទីក្រុងតេអេរ៉ង់ បានធ្វើការច្រានចោលទាំងស្រុង ៕