រដ្ឋមន្ត្រីការបរទេសបារាំង នៅថ្ងៃពុធ (ទី៨ ខែមករា) នេះ បាននិយាយថា សហភាពអឺរ៉ុប (EU) នឹងមិនបណ្ដោយឲ្យប្រទេសផ្សេងទៀតវាយប្រហារព្រំដែនអធិបតេយ្យភាពរបស់ខ្លួនឡើយ ដោយការលើកឡើងនេះ ជាការឆ្លើយតបទៅនឹងការអត្ថាធិប្បាយរបស់ប្រធានាធិបតីជាប់ឆ្នោតអាមេរិក លោក Donald Trump ជុំវិញការកាន់កាប់ដែនដី Greenland។

លោក Trump បានបដិសេធកាលពីថ្ងៃទី៦ ខែមករា ដើម្បីច្រានចោលវិធានការយោធា ឬសេដ្ឋកិច្ច ដែលជាផ្នែកមួយនៃគោលបំណងរបស់លោក ដើម្បីឲ្យសហរដ្ឋអាមេរិកបានគ្រប់គ្រងដែនដី Greenland ក៏ដូចជាព្រែកជីកប៉ាណាម៉ាផងដែរ។

រដ្ឋមន្ត្រីការបរទេសបារាំង លោក Jean-Noel Barrot បានប្រាប់ថា លោកមិនជឿថា សហរដ្ឋអាមេរិកនឹងលុកលុយកោះអាកទិកដ៏ធំដែលជាផ្នែកមួយនៃដែនដីប្រទេសដាណឺម៉ាកអស់រយៈពេលជាង ៦០០ឆ្នាំមកហើយនោះទេ។

លោកបានប្រាប់វិទ្យុ France Inter ថា៖ «ច្បាស់ណាស់គ្មានអ្វីត្រូវសង្ស័យទេ ដែលថា សហភាពអឺរ៉ុប នឹងមិនបណ្ដោយឲ្យប្រទេសផ្សេងទៀតនៃពិភពលោក វាយប្រហារលើព្រំដែនអធិបតេយ្យភាពរបស់ខ្លួន ទោះបីជាពួកគេជានរណាក៏ដោយ។ យើងជាទ្វីបដ៏រឹងមាំមួយ»។

គួរបញ្ជាក់ថា ការអត្ថាធិប្បាយរបស់លោក Trump បានគូសបញ្ជាក់បន្ថែម អំពីរបៀបវារៈវាតទីនិយម ដែលបានកើតឡើងក្នុងរយៈពេល ២សប្តាហ៍ មុនពេលដែលលោកប្រារព្ធពិធីស្បថចូលកាន់តំណែង នៅថ្ងៃទី ២០ ខែមករា ក្នុងទីក្រុងវ៉ាស៊ីនតោន។

យ៉ាងណាក្ដី លោក Barrot បានសង្កត់ធ្ងន់ថា៖ «ប្រសិនបើអ្នកសួរខ្ញុំថា តើខ្ញុំគិតថា សហរដ្ឋអាមេរិកនឹងលុកលុយដែនដី Greenland ទេ ចម្លើយរបស់ខ្ញុំ គឺទេ។ ប៉ុន្តែបើសួរថា តើយើងបានចូលដល់សម័យកាលដែលអ្នកខ្លាំងបំផុតសមនឹងរស់រានមែនទេ? ចម្លើយរបស់ខ្ញុំ គឺមែនហើយ»៕