ក្រុមមន្ត្រីក្នុងតំបន់បាននិយាយថា មនុស្សយ៉ាងហោចណាស់១៣ នាក់បានស្លាប់ និង៣២ នាក់ផ្សេងទៀតបានរងរបួសក្នុងការបាញ់ផ្លោងរបស់រុស្ស៊ីនៅទីក្រុង ហ្សាប៉ូរីហ្សា (Zaporizhzhia)ភាគខាងត្បូងប្រទេសអ៊ុយក្រែន។ 

ប្រធានតំបន់នេះ លោកអ៊ីវ៉ាន់ ហ្វេដូរ៉ូ( Ivan Fedorov) បាននិយាយថាកងទ័ពរុស្សីបានវាយប្រហារទីក្រុងនេះទាំងកណ្តាលថ្ងៃ ដោយបន្ថែមថា ការទម្លាក់គ្រាប់បែកពីលើអាកាសចំនួនពីរគ្រាប់បានត្រូវចំអគារលំនៅដ្ឋានប្រជាពលរដ្ឋមួយចំនួន។ 

ការវាយប្រហារនេះ បានកើតមានឡើង បន្ទាប់ពីកងកម្លាំងយោធាអ៊ុយក្រែន បានវាយប្រហារចូលជ្រៅ និងប៉ះចំទីតាំងស្តុកប្រេងយោធាដ៏សំខាន់របស់រុស្ស៊ី ។

ប្រធានាធិបតីអ៊ុយក្រែនលោក Volodymyr Zelensky បានអំពាវនាវឱ្យសម្ព័ន្ធមិត្តដាក់សម្ពាធលើប្រទេសរុស្ស៊ី ចំពោះអំពើភេរវកម្មនេះ ចំណែកយោធារុស្ស៊ី ពុំបានធ្វើអត្ថាធិប្បាយទេ។

នៅក្នុងសេចក្តីថ្លែងការណ៍មួយក្រោយការវាយប្រហារកាលពីថ្ងៃពុធសប្ដាហ៍នេះ លោកប្រធានាធិបតី Zelensky បាននិយាយថាគ្មានអ្វីឃោរឃៅជាងការទម្លាក់គ្រាប់បែកពីលើអាកាសលើទីក្រុងនោះទេ ទាំងដែលដឹងថាជនស៊ីវិលធម្មតានឹងរងទុក្ខ៕