​បាល់ទាត់៖ ក្រុម​អង់គ្លេស West Ham United បាន​ធានា​កៅអី​នៅ​ជុំ​បន្ត​ហើយ​នៃ​ក្របខណ្ឌ UEFA Europa League ក្រោយ​ស្មើ​នៅ​ទឹកដី KRC Genk ២-២ យប់មិញ​។ ​​ក្រុម​ម្ចាស់ផ្ទះ​បើក​ការនាំ​មុខមុន​តាំងពី​នាទី​ទី៤ ដោយ Joseph Paintsil មុនពេល​ដែល West Ham វាយបក​ពីក្រោយ​ ២​គ្រាប់​វិញ​នៅ​វគ្គ​ទី២ ដោយ Benrahma នៅ​នាទី​ទី៥៩ និង ៨២​។

​​West Ham ស្ទើ​តែ​បាន​ ៣​ពិន្ទុ​ពី​ការប្រកួត​នេះ​ទៅហើយ​តែ Tomas Soucek ភ្លាត់ស្នៀត​ចូល​ទី​ខ្លួនឯង​នៅ​នាទី​ទី៨៧​។ ​​ក្រោយ​ ៤​ប្រកួត​ពី​ការប្រកួត​ក្នុង​ពូ​ល H នេះ West Ham មាន ៩ពិន្ទុ​ក្រោយ​ឈ្នះ ៣ ស្មើ ១ មិនដែល​ចាញ់ តាម​ពីក្រោយ​ដោយ Dinamo Zagreb មាន ៦ពិន្ទុ, KRC Genk ៤ពិន្ទុ និង Rapid Vienna ៣ពិន្ទុ​។ ​​លទ្ធផល​ស្មើ និង​ធានាបាន​កៅអី​នៅ​ជុំ​បន្ត​នេះ​គឺជា​ការអបអរសាទរ​ប្រកួត​ទី ១០០០ របស់​អ្នកចាត់ការ David Moyes ក្នុង​អាជីព​ជា​អ្នកចាត់ការ​ផងដែរ​រយៈពេល​ជិត ២៤ឆ្នាំ​។​ ​​បន្ទាប់ពី​ដឹកនាំ Everton, Manchester United, Real Sociedad, Sunderland និង​បច្ចុប្បន្ន West Ham លោក David Moyes បាន​ក្លាយ​ជា​អ្នកចាត់ការ​ទី៣៥ នៅក្នុង​សមាគម​អ្នកចាត់កា​រលីគដែល​បាន​ដឹកនាំ​ដល់​ប្រកួត​ទី ១០០០៕

​អត្ថបទ​៖​នាង សុភា​វុ​ធ