ប្រទេសបារាំងបានព្រមានលោក Donald Trump ប្រឆាំងនឹងការព្យាយាមដណ្តើមកាន់កាប់ តំបន់ ហ្គ្រីនលែនដ៍ (Greenland) ដោយកម្លាំងយោធា ឬការបង្ខិតបង្ខំផ្នែកសេដ្ឋកិច្ច។

រដ្ឋមន្ត្រីការបរទេសបារាំង លោក ហ្សង់នូអែល បារូត (Jean-Noel Barrot) បាននិយាយថា សហភាពអឺរ៉ុបនឹងមិនអនុញ្ញាតឱ្យប្រទេសផ្សេងទៀតនៃពិភពលោក វាយប្រហារព្រំដែនអធិបតេយ្យភាពរបស់ខ្លួនឡើយ ទោះពួកគេជានរណាក៏ដោយ។

លោកបាននិយាយបែបនេះ បន្ទាប់ពីបទសម្ភាសន៍របស់ប្រធានាធិបតីជាប់ឆ្នោតសហរដ្ឋអាមេរិកក្នុងអំឡុងពេលដែលលោកពុំបានច្រានចោលការប្រើយោធា ឬសកម្មភាពសេដ្ឋកិច្ច ដើម្បីដណ្ដើមយក តំបន់ហ្គ្រីនលែនដ៍ និងព្រែកជីកម៉ាណាម៉ា (Panama)នោះទេ។

ចំណែកលោក អូឡាហ្វ សូល (Olaf Scholz)អធិការបតីអាល្លឺម៉ង់ ក៏បានចេញការព្រមានចំពោះទង្វើរបស់លោក Trumpដែលគំរាមដណ្ដើមយកតំបន់ហ្គ្រីនលែនដ៍ នេះដែរ។ក្រុមមេដឹកនាំអឺរ៉ុបនិយាយថាយើងត្រូវតែឈររួមគ្នាប្រឆាំងការគំរាមរបស់លោក Trump។ 

កោះអាកទិកដ៏ធំមួយនៃតំបន់ហ្គ្រីនលែនដ៍ គឺជាផ្នែកមួយរបស់ប្រទេសដាណឺម៉ាក ដែលជាប្រទេសសមាជិកសហភាពអឺរ៉ុបអស់រយៈពេលជាង ៦០០ឆ្នាំមកហើយ។

លោកបារូត បានសង្កត់ធ្ងន់ថាច្បាស់ជាគ្មានសំណួរទេដែលថាសហភាពអឺរ៉ុបនឹងអនុញ្ញាតឱ្យប្រទេសផ្សេងទៀតនៃពិភពលោកវាយប្រហារព្រំដែនអធិបតេយ្យភាពរបស់ខ្លួន មិនថាពួកគេជានរណាក៏ដោយ។ យើងគឺជាទ្វីបដ៏រឹងមាំមួយ។ 

លោក Trump ដែលនឹងវិលត្រឡប់ទៅកាន់សេតវិមានសម្រាប់អាណត្តិទីពីរជាប្រធានាធិបតីនៅថ្ងៃទី ២០ខែមករាខាងមុខនេះ ក៏បានបង្ហើបគំនិតនៃការប្រែក្លាយកាណាដាទៅជារដ្ឋរបស់សហរដ្ឋអាមេរិកផងដែរថាលោកនឹងទាមទារការចំណាយលើវិស័យការពារជាតិខ្ពស់ជាងមុនពីសម្ព័ន្ធមិត្តណាតូហើយបានសន្យាថានឹងផ្លាស់ប្តូរឈ្មោះឈូងសមុទ្រម៉ិកស៊ិកទៅឈូងសមុទ្រអាមេរិកវិញ៕