ការវាយប្រហារដោយយានដ្រូនមានសារៈសំខាន់ណាស់ចំពោះជោគជ័យរបស់ក្រុមឧទ្ទាមមីយ៉ាន់ម៉ា រួមទាំងការវាយរុញកងទ័ពរបបសឹកចេញពីតំបន់ធំៗនៅភាគខាងជើងនៃសហភាពមីយ៉ាន់ម៉ា ដែលភាគច្រើននៅជិតព្រំដែនជាមួយប្រទេសចិន។

ឥឡូវនេះ យោធាកំពុងប្រើប្រាស់យុទ្ធសាស្រ្តដូចទៅនឹងក្រុមយុទ្ធជនប្រឆាំងរដ្ឋប្រហារ ដោយការប្រើប្រាស់យានដ្រូនដើម្បីបាញ់ទម្លាក់កាំភ្លើងត្បាល់ ឬការវាយប្រហារកំណត់គោលដៅដោយកាំភ្លើងធំ និងគ្រាប់បែកផ្សេងទៀត។

មន្ត្រីយោធាជួរមុខម្នាក់បានប្រាប់សារព័ត៌មាន AFP ថា "យើងខ្សោយខាងបច្ចេកវិទ្យា និងរងទុក្ខយ៉ាងខ្លាំង ប៉ុន្តែឥឡូវនេះ យើងក៏កំពុងប្រើយានដ្រូនសម្រាប់ការវាយបកទៅវិញ។ បើក្រុមឧទ្ទាមបានប្រើឧបករណ៍រារាំងការចាប់សញ្ញា ឬយានដ្រូនអ្វីផ្សេង យើងក៏ប្រើគ្រឿងបែបនោះវាយត្រឡប់ទៅវិញដែរ»។

អ្នកប្រយុទ្ធបានរត់ពន្ធយានដ្រូន ដែលបង្កើតឡើងសម្រាប់គោលបំណងថតភាពយន្ត ឬកសិកម្ម និងដែលភាគច្រើនផលិតនៅក្នុងប្រទេសចិន ដោយសារតែឧស្សាហកម្មយានដ្រូនលំដាប់ពិភពលោករបស់ខ្លួន ដោយដឹកចូលជំរំប្រឆាំងរដ្ឋាភិបាល ហើយកែច្នៃទៅជាឧបករណ៍ដឹកប្រេងឆៅ ឬដើម្បី "ទម្លាក់គ្រាប់បែក" យ៉ាងមានប្រសិទ្ធភាព។

មន្ត្រីយោធាជាន់ខ្ពស់ជាច្រើនបានទទួលស្គាល់ថា ការវាយប្រហារដោយយានដ្រូន គឺជាគន្លឹះក្នុងការវាយលុករបស់ពួកឧទ្ទាមដ៏ធំមួយកាលឆ្នាំ២០២៣ ដែលបានរុញច្រានកងទ័ពយោធាចេញពីរដ្ឋ Shan ភាគខាងជើង ចម្ងាយរាប់ពាន់គីឡូម៉ែត្រក្រឡា៕