អង្គការកាកបាទក្រហម បានអំពាវនាវកាលពីថ្ងៃពុធ (០៨ មករា) ឱ្យមានការសម្រួលក្នុងការចូលទៅកាន់តំបន់ហ្កាហ្សា ប្រកបដោយសុវត្ថិភាព និងគ្មានការរារាំង ដើម្បីនាំយកជំនួយដែលត្រូវការយ៉ាងខ្លាំងចូលទៅក្នុងទឹកដីប៉ាឡេស្ទីនដែលហែកហួរដោយសង្រ្គាម និងរងគ្រោះពីបញ្ហាអាកាសធាតុមួយនេះ ជាទីដែលភាពអត់ឃ្លានរីករាលដាល និងទារកទើបកើតជាច្រើនរងារហូតដល់ស្លាប់។

សហព័ន្ធកាកបាទក្រហមអន្តរជាតិ IFRC និងសង្គមអឌ្ឍចន្ទក្រហម បាននិយាយថា ភ្លៀងធ្លាក់ខ្លាំង និងទឹកជំនន់បានបំផ្លិចបំផ្លាញជម្រកបណ្តោះអាសន្ននៅហ្កាហ្សា ដោយធ្វើឱ្យមនុស្សរាប់ពាន់នាក់ ត្រូវស៊ូទ្រាំរស់នៅក្នុងទឹកជំនន់រហូតដល់ ៣០សង់ទីម៉ែត្រ នៅខាងក្នុងតង់ចាស់ៗរបស់ពួកគេ។

កាកបាទក្រហមនិយាយថា លក្ខខណ្ឌអាកាសធាតុដ៏អាក្រក់កំពុង "ធ្វើឱ្យមានស្ថានភាពដែលមិនអាចទ្រាំទ្របាន" នៅក្នុងតំបន់ហ្កាហ្សា ដោយចង្អុលបង្ហាញថា ក្រុមគ្រួសារជាច្រើនត្រូវលំបាក "រស់នៅនៅក្នុងជំរំបណ្តោះអាសន្ន ដោយមិនមានសូម្បីតែសម្ភារៈចាំបាច់បំផុតដូចជាភួយ ខ្នើយជាដើម"។

ដោយលើកឡើងពីអង្គការសហប្រជាជាតិ កាកបាទក្រហមបានគូសបញ្ជាក់ពីការស្លាប់របស់ទារកទើបនឹងកើតចំនួន ៨នាក់ ដោយសារត្រជាក់ខ្លាំងនៅក្នុងតង់ខ្វះគ្មានភាពកក់ក្តៅ ឬការការពារពីទឹកភ្លៀង និងសីតុណ្ហភាពធ្លាក់ចុះ ដែលការស្លាប់ទាំងនោះ "បញ្ជាក់ពីភាពធ្ងន់ធ្ងរនៃវិបត្តិមនុស្សធម៌ហ្កាហ្សា"។

កាកបាទក្រហមសង្កត់ធ្ងន់ថា ការបិទច្រកព្រំដែនក្រុងរ៉ាហ្វា ដ៏សំខាន់នៅក្នុងខែឧសភា បានជះឥទ្ធិពលយ៉ាងធ្ងន់ធ្ងរដល់ស្ថានភាពមនុស្សធម៌ ដោយព្រមានថា "មានតែជំនួយមួយចំនួនតូចប៉ុណ្ណោះ ដែលចូលទៅក្នុងតំបន់ហ្កាហ្សា"៕