លោកប្រធានាធិបតីជាប់ឆ្នោត Donald Trump និងសម្ព័ន្ធមិត្តក្នុងបក្សសាធារណរដ្ឋ មានការខ្វែងគំនិតគ្នា បន្ទាប់ពីលោក Trump ស្នើសុំឱ្យតុលាការកំពូលរារាំងបម្រាមរបស់អាមេរិក នៅលើកម្មវិធី TikTok នៅក្នុងសំណុំរឿងដ៏ធំមួយដែលនឹងត្រូវបានបើកសវនាការនៅថ្ងៃសុក្រ (១០ មករា) ស្អែកនេះ ខណៈសមាជិកសាធារណរដ្ឋជាច្រើន បានជំរុញឱ្យតុលាការធ្វើផ្ទុយពីនោះ។

ទស្សនៈផ្សេងគ្នាទាំងនេះបង្កើនហានិភ័យសម្រាប់តុលាការ ដែលមានសំឡេងអ្នកអភិរក្សនិយមភាគច្រើន ៦ ទល់នឹង៣ ខណៈខ្លួនត្រៀមសម្រេចជោគវាសនានៃវេទិកាប្រព័ន្ធផ្សព្វផ្សាយសង្គម TikTok ដ៏ពេញនិយម ដែលប្រើដោយជនជាតិអាមេរិកប្រហែលពាក់កណ្តាលប្រទេស នៅក្នុងបណ្ដឹងដែលនឹងសាកល្បងវិសោធនកម្មទីមួយនៃរដ្ឋធម្មនុញ្ញរបស់អាមេរិក ដែលការពារការបញ្ចេញមតិដោយសេរី។

លោក Trump និយាយថា មាន "កន្លែងកក់ក្តៅ" សម្រាប់ TikTok ហើយប្តេជ្ញាថានឹង "សង្រ្គោះ" វេទិកានេះ ដែលវីដេអូផ្សព្វផ្សាយយុទ្ធនាការបោះឆ្នោតរបស់លោក ទទួលបាន "ការមើលរាប់ពាន់លានដង"។ ផ្ទុយទៅវិញ សមាជិកសភា និងមន្ត្រីបក្សសាធារណរដ្ឋជាច្រើនកំពុងដាក់សម្ពាធលើតុលាការ ឱ្យគាំទ្រដល់រដ្ឋបាលលោក Joe Biden ក្នុងការដាក់បម្រាម។

គួរបញ្ជាក់ថា សភាអាមេរិក បានអនុម័តការហាមឃាត់ TikTok កាលពីឆ្នាំមុន ដោយមានការគាំទ្រទ្វេបក្ស ហើយប្រធានាធិបតីបក្សប្រជាធិបតេយ្យ លោក Joe Biden ក៨បានចុះហត្ថលេខាឱ្យក្លាយជាច្បាប់ពេញលេញ។ បម្រាមនោះទាមទារឱ្យក្រុមហ៊ុនមេដែលមានមូលដ្ឋាននៅចិនរបស់ TikTok គឺ ByteDance ឱ្យលក់អេបនេះ ឬមិនដូច្នេះទេនឹងប្រឈមការហាមឃាត់ នៅថ្ងៃទី១៩ ខែមករា៕