បេសកជនពិសេសរបស់អង្គការសហប្រជាជាតិ បាននិយាយកាលពីថ្ងៃពុធថា អង្គការសហប្រជាជាតិបានត្រៀមជាស្រេចដើម្បីធ្វើការជាមួយរដ្ឋាភិបាលបណ្តោះអាសន្នរបស់ប្រទេសស៊ីរី លើការឈានឆ្ពោះទៅរកអន្តរកាលនយោបាយដែលអាចជឿទុកចិត្តបាន និងសមាហរណ្មកម្ម។

លោក Geir Pedersen បេសកជនពិសេសរបស់អង្គការសហប្រជាជាតិប្រចាំប្រទេសស៊ីរី បាននិយាយទៅកាន់ក្រុមប្រឹក្សាសន្តិសុខអង្គការសហប្រជាជាតិ តាមបណ្តាញវីដេអូ ពីទីក្រុងហ្សឺណែវ ថា «ថ្ងៃនេះ ប្រទេសស៊ីរី ស្វែងរកគំនូសផ្លូវថ្មី បន្ទាប់ពីការដួលរលំអតីតរបប លោក Assad កាលពីមួយខែមុន។

លោកនិយាយថា «ស៊ីរី និងសហគមន៍អន្តរជាតិ ចាំបាច់ត្រូវទទួលបានដំណាក់កាលបន្ទាប់ដ៏ត្រឹមត្រូវ ហើយអង្គការសហប្រជាជាតិ ត្រៀមជាស្រេចដើម្បីធ្វើអ្វីៗគ្រប់យ៉ាងដែលយើងអាចធ្វើបាន ដើម្បីជួយសម្រួល និងជួយប្រទេសនេះ»។

ទោះជាយ៉ាងណា លោកបានបញ្ជាក់ថា មានសញ្ញានៃអស្ថិរភាពនៅក្នុងតំបន់ ដែលស្ថិតនៅក្រោមការគ្រប់គ្រងរបស់រដ្ឋាភិបាលបណ្តោះអាសន្ន រួមទាំងរបាយការណ៍អំពីអំពើហិង្សានៅតំបន់ឆ្នេរ នៅទីក្រុង Homs និងទីក្រុង Hama។

លោក Pedersen និយាយថា នៅក្នុងតំបន់ធំៗ នៅក្រៅការគ្រប់គ្រងរបស់អាជ្ញាធរ ជម្លោះនៅតែបន្តមាន។ បេសកជនពិសេសរូបនេះ បានអំពាវនាវ និងបង្ហាញការគាំទ្ររបស់លោកសម្រាប់ការអភិវឌ្ឍបន្ថែមទៀតគ្រប់បណ្តាញនៃការសន្ទនា និងបានជំរុញឱ្យភាគីទាំងអស់ស្វែងរកមធ្យោបាយឈានឆ្ពោះទៅមុខ ដោយគ្មានការប្រឈមមុខដាក់គ្នាខាងយោធា។