មនុស្សជិត ៤០០នាក់ បានស្លាប់ ដោយសារការស្រេកឃ្លាន នៅក្នុងតំបន់ Tigray និង Amhara នៃប្រទេសអេត្យូពី ក្នុងរយៈពេលប៉ុន្មានខែថ្មីៗនេះ ដែលជាការទទួលស្គាល់ដ៏កម្រនៃការស្លាប់ទាក់ទងនឹងភាពអត់ឃ្លាន ដោយស្ថាប័នសហព័ន្ធមួយ។

មន្ត្រីក្នុងតំបន់ ធ្លាប់បានរាយការណ៍ពីការស្លាប់ដោយអត់អាហារ នៅក្នុងស្រុករបស់ពួកគេ ប៉ុន្តែរដ្ឋាភិបាលសហព័ន្ធរបស់ប្រទេសអេត្យូពី បានអះអាងថា របាយការណ៍ទាំងនេះ គឺ «ខុសទាំងស្រុង»។

ការិយាល័យទទួលពាក្យបណ្តឹងរបស់ពលរដ្ឋនៃប្រទេសអេត្យូពី បានបញ្ជូនអ្នកជំនាញ ទៅកាន់តំបន់ដែលទទួលរងនូវគ្រោះរាំងស្ងួត ហើយនៅតែកើតឡើងពីសង្គ្រាមស៊ីវិលដ៏បំផ្លិចបំផ្លាញ ដែលបានបញ្ចប់ជាផ្លូវការកាលពី ១៤ខែ កន្លងទៅនេះ។ ពួកគេបានសន្និដ្ឋានថា មនុស្ស ៣៥១នាក់ បានស្លាប់ ដោយសារភាពស្រេក ឃ្លាន នៅតំបន់ Tigray ក្នុងរយៈពេល ៦ខែចុងក្រោយនេះ ជាមួយនឹងការស្លាប់ចំនួន ៤៤នាក់ទៀត នៅតំបន់ Amhara។

យោងតាមកំណត់ត្រាជំនួយ ដែលបានឃើញដោយសារព័ត៌មាន AP បានឲ្យដឹងថា មនុស្សខ្វះខាតមួយចំនួនតូចប៉ុណ្ណោះ នៅក្នុងតំបន់ Tigray កំពុងទទួលបានជំនួយស្បៀងអាហារ រយៈពេលជាងមួយខែ បន្ទាប់ពីភ្នាក់ងារជំនួយ បានបន្តការចែកចាយគ្រាប់ធញ្ញជាតិឡើងវិញ បន្ទាប់ពីការផ្អាកយ៉ាងយូរ ដោយសារមានការលួច។