រដ្ឋមន្ត្រីការពារជាតិអាមេរិក លោក Lloyd Austin បានប្រាប់សារព័ត៌មាន AP ថា សហរដ្ឋអាមេរិក ចាំបាច់ត្រូវរក្សាកងទ័ព ដែលដាក់ពង្រាយនៅក្នុងប្រទេសស៊ីរី ដើម្បីទប់ស្កាត់ក្រុមរដ្ឋឥស្លាមដេស( Daesh) (ដែលគេស្គាល់ថា ISIS) ពីការបង្កើតឡើងជាថ្មី ដែលជាការគំរាមកំហែងដ៏សំខាន់មួយ បន្ទាប់ពីការទម្លាក់រដ្ឋាភិបាលរបស់លោក បាសា អាល់អាសាដ។

លោក Austin បានថ្លែងកាលពីថ្ងៃពុធនៅក្នុងបទសម្ភាសន៍ចុងក្រោយ មុនពេលលោកចាកចេញពីតំណែងថា កងកម្លាំងអាមេរិក នៅតែចាំបាច់បន្តនៅទីនោះ ជាពិសេស ដើម្បីធានាសន្តិសុខនៃជំរំឃុំឃាំងដែលផ្ទុកអតីតយុទ្ធជន Daesh និងសមាជិកគ្រួសាររាប់ម៉ឺននាក់ នៅទីនោះ។ 

យោងតាមការប៉ាន់ប្រមាណ មានយុទ្ធជន Daesh ចន្លោះពី ៨.000នាក់ ទៅ ១០.000នាក់ នៅក្នុងជំរំ ហើយយ៉ាងហោចណាស់ ២.000នាក់ ត្រូវបានគេចាត់ទុកថា មានគ្រោះថ្នាក់ខ្លាំងណាស់។

លោក Austin បាននិយាយនៅឯមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់ ជាកន្លែងដែលលោកបានធ្វើដំណើរទៅពិភាក្សាអំពីជំនួយយោធាសម្រាប់អ៊ុយក្រែន ជាមួយប្រទេសជាដៃគូប្រមាណ ៥០ ថា ប្រសិនបើស៊ីរី ត្រូវបានទុកចោល ដោយពុំមានការការពារនោះ «ខ្ញុំគិតថា យុទ្ធជន IS នឹងចូលទៅក្នុងចរន្តសំខាន់នេះឡើងវិញ»។ លោកកំពុងប្រើអក្សរកាត់មួយទៀតសម្រាប់ក្រុម Daesh។

លោកបានបន្តទៀតថា៖«ខ្ញុំគិតថា យើងនៅតែមានការងារមួយចំនួនដែលត្រូវធ្វើ ទាក់ទងនឹងការបន្តប្រយុទ្ធប្រឆាំងនឹងក្រុមរដ្ឋឥស្លាមDaesh»។