លោក Keith Kellogg បេសកជនពិសេសទទួលបន្ទុកអ៊ុយក្រែនរបស់អ្នកនយោបាយរូបនេះ បាននិយាយថា ប្រធានាធិបតីជាប់ឆ្នោតអាមេរិកលោក ដូណាល់ ត្រាំ (Donald Trump) ចង់បញ្ចប់ជម្លោះនៅអ៊ុយ  ក្រែនឲ្យបានឆាប់ តាមដែលអាចធ្វើទៅបាន។  

លោកបាននិយាយនៅក្នុងបទសម្ភាសន៍ជាមួយសារព័ត៌មាន Fox Newsថា៖«គាត់ចង់បញ្ចប់ជម្លោះឲ្យលឿន តាមដែលគាត់អាចធ្វើបាន។ នេះគឺជាសង្រ្គាមដែលត្រូវតែបញ្ចប់ ហើយខ្ញុំគិតថា គាត់អាចធ្វើ    បាន។ 

ខ្ញុំពិតជាមានទំនុកចិត្តច្រើនលើសមត្ថភាពរបស់គាត់ ក្នុងការឈានទៅដល់ទីតាំងមួយ នៅពេលដែលសង្រ្គាមនេះ ត្រូវបានបញ្ចប់យ៉ាងពិតប្រាកដនោះ។

លោក Kellogg បានសង្កត់ធ្ងន់ថា ការបញ្ចប់ជម្លោះនៅអ៊ុយក្រែន មានសារៈសំខាន់សម្រាប់សន្តិសុខជាតិរបស់សហរដ្ឋអាមេរិក អឺរ៉ុប និងពិភពលោកទាំងមូល។

ក្នុងពេលជាមួយគ្នានោះ បេសកជនរូបនេះ បានបន្ថែមថា លោក ត្រាំ «មិនព្យាយាមផ្តល់អ្វីមួយដល់លោកពូទីន ឬដល់ប្រជាជនរុស្ស៊ីទេ»។ លោក Kellogg បានបញ្ជាក់ទៀតថា៖«គាត់ពិតជាកំពុងព្យាយាមជួយ  សង្គ្រោះអ៊ុយក្រែន និងរក្សាទុកអធិបតេយ្យភាពរបស់ពួកគេ ហើយគាត់នឹងធ្វើឲ្យមានភាពច្បាស់លាស់ថា វាមានភាពសមធម៌ និងមានយុត្តិធម៌ពិតប្រាកដ»។