ដែនដី Greenland មានសារៈសំខាន់ សម្រាប់សន្តិសុខជាតិរបស់សហរដ្ឋអាមេរិក។ នេះជាសម្ដីរបស់សមាជិកសភាអាមេរិក លោក Mike Waltz ដែលបាននិយាយកាលពីថ្ងៃពុធ (ទី៨ ខែមករា) បន្ទាប់ពីមានការអត្ថាធិប្បាយរបស់ប្រធានាធិបតីជាប់ឆ្នោតអាមេរិក លោក Donald Trump ដែលលើកឡើងថា សហរដ្ឋអាមេរិកគួរតែបានគ្រប់គ្រងកោះនេះ។

ក្នុងអំឡុងពេលផ្ដល់បទសម្ភាសន៍ជាមួយប្រព័ន្ធផ្សព្វផ្សាយ Fox News លោក Waltz ដែលត្រូវបានជ្រើសរើសឲ្យធ្វើជាទីប្រឹក្សាសន្តិសុខជាតិរបស់លោក Trump ត្រូវបានសួរអំពីការចង់បានរបស់លោក Trump ឲ្យសហរដ្ឋអាមេរិកគ្រប់គ្រងលើកោះអាកទិកមួយនេះ។

លោកបាននិយាយថា៖ «មានប្រទេសរុស្ស៊ីដែលកំពុងព្យាយាមក្លាយជាស្តេចនៃតំបន់អាក់ទិក ដោយមាននាវាបំបែកទឹកកកចំនួន ៦០គ្រឿង ដែលខ្លះប្រើថាមពលនុយក្លេអ៊ែរ។ យើងមាន ២គ្រឿង ហើយមួយគ្រឿងទើបតែត្រូវអគ្គិភ័យឆាបឆេះ»។

លោក Waltz បានបន្ថែមថា៖ «នេះពាក់ព័ន្ធនឹងសារធាតុរ៉ែដ៏សំខាន់។ វាពាក់ព័ន្ធនឹងធនធានធម្មជាតិ។ ឥឡូវនេះ ជនជាតិចិន កំពុងផលិតនាវាបំបែកផ្ទាំងទឹកកក ហើយកំពុងពង្រីកប្រតិបត្តិការ នៅទីនោះផងដែរ។ ដូច្នេះវាពាក់ព័ន្ធនឹងប្រេង និងឧស្ម័ន។ វាគឺជាសន្តិសុខជាតិរបស់យើង»។

លោក Trump ដែលត្រូវចូលកាន់តំណែងនៅថ្ងៃទី២០ ខែមករា បានបដិសេធកាលពីថ្ងៃទី៧ ខែមករា ដែលច្រានចោលការប្រើប្រាស់វិធានការយោធា ឬសេដ្ឋកិច្ច ដើម្បីបានគ្រប់គ្រងកោះដែលជាដែនដីស្វយ័តរបស់ដាណឺម៉ាក។ នៅក្នុងអាណត្តិដំបូងរបស់លោក លោក Trump បានលើកឡើងថា ប្រទេសដាណឺម៉ាកគួរតែលក់ដែនដី Greenland ប៉ុន្តែរដ្ឋាភិបាលដាណឺម៉ាក បានច្រានចោលគំនិតនោះ។

នាយករដ្ឋមន្ត្រីដែនដី Greenland លោក Mute Egede ក៏បានបញ្ជាក់ផងដែរថា កោះនេះមិនមែន សម្រាប់លក់នោះទេ។ តែយ៉ាងណាក្ដី រដ្ឋាភិបាលនៃកោះអាកទិកមួយនេះ កាលពីថ្ងៃទី៨ ខែមករា បានទទួលស្គាល់ការប្រែប្រួលឥទ្ធិពលសន្តិសុខ នៅក្នុងតំបន់អាកទិក ហើយបាននិយាយថា ខ្លួនទន្ទឹងរង់ចាំធ្វើការជាមួយរដ្ឋបាលខាងមុខរបស់លោក Trump និងសម្ព័ន្ធមិត្តអង្គការណាតូផ្សេងទៀត ដើម្បីធានាសន្តិសុខ និងស្ថិរភាព នៅក្នុងតំបន់៕