អ្នកសារព័ត៌ាមានអ៊ីតាលី នាង Cecilia Sala ត្រូវបានអ៊ីរ៉ង់ដោះលែង បន្ទាប់ពីជាប់ពន្ធនាគាររយៈពេល ៣សប្តាហ៍ ហើយបានវិលត្រលប់ទៅកាន់ប្រទេសកំណើតវិញហើយ។

នាយករដ្ឋមន្ត្រីអ៊ីតាលី លោកស្រី Giorgia Meloni និងរដ្ឋមន្ត្រីការបរទេស លោក Antonio Tajani បានបង្ហាញវត្តមាន ដើម្បីស្វាគមន៍អ្នកសារព័ត៌មានវ័យ ២៩ឆ្នាំរូបនេះ ខណៈដែលនាងជិះយន្តហោះត្រលប់ទៅទីក្រុងរ៉ូមវិញ កាលពីថ្ងៃពុធ (ទី៨ ខែមករា) ដោយបង្ហាញពីសារៈសំខាន់នយោបាយទាក់ទងនឹងករណីរបស់នាង។

គួរបញ្ជាក់ថា នាង Sala អ្នកនិពន្ធ និងជាអ្នកធ្វើផតខេស្ត បាន និងកំពុងធ្វើការដោយមានទិដ្ឋាការអ្នកសារព័ត៌មានត្រឹមត្រូវតាមច្បាប់ នៅពេលដែលរូបនាងត្រូវបានឃុំខ្លួន ក្នុងទីក្រុងតេអេរ៉ង់ កាលពីថ្ងៃទី១៩ ខែធ្នូ ឆ្នាំ២០២៤ ដោយត្រូវបានចោទប្រកាន់ពីបទ «បំពានច្បាប់របស់សាធារណរដ្ឋឥស្លាម»។

ទីក្រុងតេអេរ៉ង់ បានបដិសេធពាក្យលើកឡើង ដែលថា ការចាប់ខ្លួនរូបនាង ត្រូវបានផ្សារភ្ជាប់ទៅនឹងការឃុំខ្លួនរបស់ទីក្រុងរ៉ូម ចំពោះពាណិជ្ជករអ៊ីរ៉ង់ដែលសហរដ្ឋអាមេរិកចោទប្រកាន់ថា មានជាប់ពាក់ព័ន្ធក្នុងការវាយប្រហារលើយោធារបស់ខ្លួន។

ដំណឹងដែលនាង Sala ត្រូវបានដោះលែង បាននាំឲ្យមានការអបអរ នៅប្រទេសអ៊ីតាលីដែលស្ថានភាពអាក្រក់របស់នាង បានគ្របដណ្តប់លើចំណងជើងធំៗរបស់សារព័ត៌មាន។ សមាជិកសភាបានសាទរចំពោះការចរចាដ៏ជោគជ័យ ក្នុងការនាំយករូបនាងមកប្រទេសវិញ ដោយបានបង្ហាញពីភាពរឹងមាំនៃការសម្រេចបានផ្នែកនយោបាយ សម្រាប់លោកស្រី Meloni៕