នៅក្នុងសេចក្តីថ្លែងការណ៍មួយបង្ហោះលើបណ្តាញព័ត៌មានសង្គម Xកាលពីថ្ងៃពុធ តារាចម្រៀងស្រីអាមេរិកនាង Paris Hilton បាននិយាយថា នាងខូចចិត្តហួសនឹងថ្លែង ក្រោយភ្លើងឆេះព្រៃបំផ្លិចបំផ្លាញផ្ទះរបស់នាងនៅរដ្ឋ California ។

វិមានមាត់ឆ្នេរសមុទ្ររបស់នាង Hilton នៅទីក្រុង Malibu ស្ថិតនៅភាគខាងលិចទីក្រុង Los Angeles ដែលនាងទិញក្នុងតម្លៃរាយការណ៍ ៨,៤លានដុល្លារ ស្ថិតនៅក្នុងចំណោមគេហដ្ឋានជាង ១ពាន់ខ្នង រងការឆាបឆេះដោយសារភ្លើងឆេះព្រៃ ដែលកំពុងរីករាលដាលលែងអាចគ្រប់គ្រងបាននៅទូទាំងទីក្រុង Los Angeles ។

នាង Hilton សរសេរនៅលើបណ្តាញព័ត៌មានសង្គម Xថា អង្គុយជាមួយគ្រួសាររបស់ខ្ញុំ មើលព័ត៌មានផ្សាយផ្ទាល់លើកញ្ចក់ទូរទស្សន៍ឃើញផ្ទះរបស់ពួកគេនៅទីក្រុង Malibuរងការឆាបឆេះគ្មានសេសសល់ គឺជាអ្វីមួយដែលគ្មាននរណាម្នាក់គួរតែធ្លាប់ឆ្លងកាត់នោះទេ ។

ដោយឡែក ផ្ទះរបស់គូស្នេហ៍តារាហូលីវូដលោក Adam Brody និងនាង Leighton Meester ហើយនិងផ្ទះមួយខ្នងទៀតរបស់តារាងសម្តែងប្រុស Billy Crystal ត្រូវបានបំផ្លិចបំផ្លាញផងដែរដោយសារភ្លើងឆេះព្រៃ ។

ភ្លើងឆេះព្រៃដ៏ធំនេះ បានលេបត្របាក់ដីព្រៃជិត ៤.៨៥៦ហិចតា នៅតំបន់ Pacific Palisades គឺជាតំបន់ទេសភាពដ៏ស្រស់បំព្រង ស្ថិតនៅចន្លោះទីក្រុងតំបន់ឆ្នេរសមុទ្រ Santa Monica និងទីក្រុង Malibu ដែលជាកន្លែងស្នាក់នៅរបស់តារាសម្តែង តារាចម្រៀង និងតារាទូរទស្សន៍ ៕